أخبـار ابـن نـاصر

لا للتعديلات الدستورية

السبت، ١٤ يوليو ٢٠٠٧

المذاكره ولا الحريه !؟

المذاكره ولا طلب الحريه

(المرة دي حاجه خفيفه عشان الناس تروق بين المواضيع الهم اللي فاتت واللي جايه-ان شاء الله )
...
كتب: ابن ناصر

عنوان غريب صح! سؤال بادرني بيه صديقي فارس قاللي هل المذاكره اصعب ولا الحريه –وهو يقصد المطالبه بالحريه- ... ماذا تعتقد انت في هذا السؤال ؟؟
انا اعتقد ان الاثنين متشابهين جدا جدا وهقولكم من وجهة نظري

ايه الفرق بين المذاكره والحريه !

1- ممكن تقعد تطالب بالحريه سنين وسنين ...وفي يوم من الايام تنجح الثوره (بقدرة الشعوب), وانك برضه ممكن تقعد تذاكر سنين سنين ...وفي يوم من الايام
تنجح في الامتحان لكن (بالقدره الالهيه)!.

2- ان اللي بيذاكر بيذاكر لنفسه ازاي يعني لو انت سقط في الامتحان انت اللي هتشيل الماده او هتعيد السنه وانت اللي هيقولوا عليك ساقط ,لكن لو طالبت بالحريه مش انت الي هتعتقل بس لأ لكن اهلك هيتبهدلوا في الاقسام واصحابك وجيرانك هيتشردو .

3- ممكن تقعد تذاكر بالسنين وعارف مستقبلك.. عاطل! وممكن تقعد تطالب بالحريه بالسنين وعارف مستقبلك.. معتقل !.

4- ممكن واحد يلهيه اللعب عن المذاكره.. فيسقط او تلهيه المذاكره عن اللعب ..فميسقطتش,, وممكن واحد برضه تلهيه الحريه ..فيخش السجن او يلهيه السجن فميطالبش بالحريه !

5-لو ذاكرت ممكن وانت مش قصدك.. تنسي لكن لو طالبت بالحريه ممكن حد ينسييك!.

6- ممكن لو مره اختلفت مع الدكتور واثبتله ان وجهة نظره غلط ممكن يحطك في دماغه وتتفصل من الجامعه وتحرم من الماده ..اما لو اختلفت مع الامن في طلب الحريه فممكن تتفصل من المجتمع وتحرم من الحياه العامه!.

7- ممكن الواحد مايذاكرش فيسقط وواحد يذاكر فيسقط برضه ! وفي بلاد من كتر الحريه وعدم وجود المشاكل الناس بتنتحر -البلاد الاسكندنافية-, وبلاد من انعدامها الناس بتنتحر برضه
!


ابن ناصر
....................................................................

المذاكرة ولا الحرية؟


...
كتب: فارس


هذا السؤال اطرحه علي نفسي كثيرا جدا اول حاجه هقولكم عليها اني ساقط سنين ياما يعني دايق طعم المرار بجد بس اول سنه اقول لنفسي ياض يا فارس طيب حاول تذاكر السنه دي قولت لنفسي ماشي ياعم ذاكر طلعت المذاكره صعبه جدا والاصعب هي الحريه فانهما الاثنين عمله واحده


ايه الفرق بين المذاكره والحريه !

-1لو انتا ذاكرت ومن الاخر يعني رضيت ضمير المذاكره ونجحت ياسيدي النتيجه ايه انك تكون عاطل!.. لكن الحريه هيجلها وقت او بمعني هيجليها يوم وهتتحقق.
...
2- لو عملت زيي وسقطت ياما وسنه ورا سنه ور سنه وابوك بيقوللك يبني انتا عقدتني في الكليه دي بس هيجي يوم وهتنجح وهتخلص لكن الحريه مش عارف امتا هيجي يومها!.
...
3- ممكن متحلمش انك بتنجح اساسا طالما انتا موجود مع اصحابك! لكن تحلم انك تكون حر في كليتك في رايك حر في بيتك حر في اختيار ريسك حر في كلامك.
..
-4 لو انتا عارف ان النتيجه في الاخر بعد عناء المذاكره وظيفه كويسه بمرتب معقول كنا ذاكرنا ونجحنا ! لكن لو انتا عارف انك حر من غير وظيفه هتنجح برده لانك هتلاقي اللي يساعدك ويشجعك.
...
5- ممكن تنسي كتير انك بتذاكر او حتي انك عايش لكن مستحيل ابدا تنسي انك في يوم تلاقي حريه!.
...
6- ممكن ابوك يجي يقوللك ياواد ذاكر علشان تنجح وكله باختيارك يعني انتا مش مجبر عليه لكن ممكن تلاقي ظابط يجبرك علي حاجهه مش فيك ولازم تنفذها!.
...
7- ممكن تكون متفوق جدا في مذاكرتك ومفيش حاجه تليهك عليها وفجاءه لقيت مظاهره في الكليه بتاعتك ونفسك تطلع فيها بس خايف من المجهول!.
...
8- ممكن تذاكر بجد اوي وتحط دماغك فيها علشان الدكتور هيمتحنك الصبح وتروح المدرج ويجي واحد صاحبك مش مذاكر علشان تغششه فيشوفك الدكتور فيطردك انتا وهو وميسلئش عن السبب!!
...
في النهايه اعتقد ان المذاكره امر واقعي لكن الحريه امر ملموس في الحياه..
متشكر ليك اوي يابن ناصر انك اديتلي الفرصه دي

أخوكم فارس

(مدونة لماذا نرحل)

..............

ابارك لصديقي فارس بالنجاح

ومتصدقهوش اهو نجح في الجامعه وفي المطالبه بالحريه

هناك ١٤ تعليقًا:

غير معرف يقول...

اول تعليق :)

موضوع عظيم زييك يا حاج احمد

احييك

yasmina يقول...

مفارقة وقارنة جميلة
وفيها مقومات من الطرفين

اما بالنسبة للسؤال
المذاكرة ام الحرية؟

سؤال محير فعلا

ولكن اجابته حسب رأيي

الاثنان معا

يمكنك المذاكرة والنجاح
يمكنك المطالبة بحريتك والتحرر

يمكنك مقاومة المحاضر
يمكنك مقاومة النظام

الثورة تنجح بالشعوب
والامتحان تنجحه بالاجتهاد

اذا ابتعدت عن الملهيات تنجح
واذا لم تنسى نفسك بالملهيات فطالب بالحرية

اذا فشلت بالامتحان فهو ذنبك
واذا انتحرت لانعدام الحرية فأنت لا تستحقها

تحياتي

ibn nasser - ابن ناصر يقول...

شكرا يا يا صديقي
طول عمرك بترفع من معنوياتي

تحياتي

ibn nasser - ابن ناصر يقول...

ياسمين
جميل جميل
يعني اهو طلع في اوجه تشابة واختلاف !!

تحياتي

أحمد المصري يقول...

جميييييييييييا مقارنة رائعة00من أجما ما قرأت0

غير معرف يقول...

ممكن يكون السبب في كل النتائج التي ربطتها بالمذاكرة

الاعتقاد الذي لا اؤمن به

بان اللي بيذاكر بيذاكر لنفسه

خطا طبعا

خطا كبير

بيذاكر لنفسه اذا يعمل لنفسه

اذا لا يحمل قضية و لا يعبا بمشكلة غيره

و هذا غير قادر على حمل حلم الحرية اصلا

kaed يقول...

العزيز إبن ناصر
الحرية تراق فى سبيلها دماء
يبقى مين بقى أسهل
على العموم مبروك للواد فارس وعقبالك

ibn nasser - ابن ناصر يقول...

أحمد المصري
شكرا لك صديقي

تحياتي

ibn nasser - ابن ناصر يقول...

قائد
في الجامعه تراق الدماء والله
ههههههه
تحياتي

kaed يقول...

إية ياعم الحاج أنا لسه كاتب الكومنت بتاعى
سبحان اللة ألاقى رد فى المدونة بتاعتك وكمان فى المدونة بتاعتى
أية يابنى السرعة دى

ibn nasser - ابن ناصر يقول...

عيب يا دوكتور ... لينا طرق غير شرعيه
;)

تحياتي

mariam يقول...

ربط جميل جدا بين المذاكره و الحريه
مش عارفه اختار بين المذاكره و الحريه

و مقدرش اعمل فدائيه و اقول الحريه و الا اكون كدابه
فى نفس الوقت مش قادره انى لا اختار الحريه

يا ريت الأنين مع بعض

موضوع اكتر من رائع

ibn nasser - ابن ناصر يقول...

مريم
يا نهار ابيض هتختاري الاتنين؟؟
لا ده كده صعب قوي
ههه

تحياتي

s يقول...

thanks