أخبـار ابـن نـاصر

لا للتعديلات الدستورية

الخميس، ١ مارس ٢٠٠٧

أسبوع شباب الجامعات في المنوفيه , أتفرج وادعيلي !؟

أسبوع شباب الجامعات -كان أسبوع مهبب زي ما قال لي جماعه اصحابي اللي كانوا هناك وأنا مش هاتكلم عن مبارك اللي راح المنوفيه وقفلو كل الشوارع والمحلات وتسقيط شبكة المحمول في المنطقه ومش هاتكلم عن جيمي اللي فضل مجتمع برئيس الجامعه ثلاثة ايام في مقر الحزب وقعد مأجل افتتاح المعرض 3 أيام وفي الاخر جيمي مدخلش المعرض اجرئات امنيه بقي !!؟ ونفسي أعرف ايه حكاية المائه وعشرين مليون الحكومه اديتها للجامعه دي بالمستوي ده الحكومه اديتها مائة وعشرين قرش بقي! وهنتفرج علي الصور وعايزين مع بعض نتحسر علي مستوي التعليم مع بعض , وسأدع الصوره تتحدث بنفسها لن أتكلم
ولكن هل نستحق فعلا مركزنا الحالي وهو( لا مركز) بين 500 جامعه في العالم؟؟
رئيس جامعة المنوفيه يفتتح المعرض بالكامل وفي ايده ازازة فانتا ,عالميه بقي!!؟

.............................................................................................................

اتفرجوا علي مساكن الطلاب اللي الحكومه عملاهولهم وياتري هو ده مستوي التعليم؟ ولا تقدير الحكومه لطلاب الجامعه !؟؟






.........................................................................................................................
مستني الاجابه مستوي التعليم ولا تقدير الحكومه للطلاب الجامعيين
...................................................................
ابن ناصر

هناك ٦٧ تعليقًا:

مصر هى أمى يقول...

يا ابن ناصر

البلد هتعملكوا ايه هيا الحكومة لاقية فلوس علشان تصرفها انتوا ايه مش بتحسوا هوا احمد عز مثلا مش لازم يقفل الاربعين مليار وبقية الحرامية فى البد ياكلوا منين وياكلوا القطط والكلاب بتاعتهم منين
يعنى متخيل مثلا يصرفوا على طلبة الجامعة ايه انتوا بتحلموا ولا ايه

ibn nasser - ابن ناصر يقول...

فعلا كلامك صح ما هو احنا كده شعب ياكل وينكر ,وبعدين الطالب لو عايز يذاكر ويتفوق ويبدع ممكن وفي ظروف أوحش من كده -(علما ان مافيش ظروف أوحش من كده)- وبالنسبه لأحمد عز عيب تقول عليه حرامي ده راجل مكافح ومناضل كفايه أن كل الجدار العازل اللي بتعمل اسرائيل من حديد أحمد عز رااجل مناضل بيبني جدار خايف علي الفلسطينين ... ولا ايه يا مصر هي أمي !؟؟

بيجاسوس المصرى يقول...

تحياتى على مدونتك الجميلة دى يا ابن ناصر

ياريتنى كنت اعرفك لانى كنت مشارك فى الاسبوع برده و الصور دى برده جميلة انتا كنت شوفت المساكن بتاعت مدينة الطليبات و اللى كان قاعد فيها جامعة بنى سويف و بنها و حلوان
كانت مهزلة خالص
بالاضافة الى سوء التنظيم فى المواعيد و التحركات و الامن من محاولة منعك لحضور العروض المسرحية اذا لم تكن من نفس الجامعة التى تعرض المسرحية

انا كتبت مذاكرت عن سبعة ايام اكثر سوادا فى حياتى فى المنوفية و لم انشرها حتى الان فارجو اننا نحاول ان ننقل الصورة الحقيقية لمهزلة اسبوع شباب الجامعات

ibn nasser - ابن ناصر يقول...

اه والله كلامك صح يا بيجاسوس المصري مانا بقولك أعرف ناس وقالولي علي مهازل وعلي فكره الصور دي من مساكن الطالبات , وليه مانشرتش مذكراتك خلي الناس تقرا وتعرف وتحياتي ليك وابقي زورني علي طول بقي

Nikolay Gogol يقول...

سلام عليكم ياشباب و عليك يابن ناصر

احقاقا للحق انا هتكلم عن اسبوع شباب الجامعات و بعديه اسبوع شباب الجامعات العرب اللى اتعملوا فى المنصورة
بجد استاد الجامعة عندنا بقه ممتاز و جميل جدا و حطوا فيه ملاعب كتير من ترتان لاسكواش لحمام سباحة و رصف كويس للشوارع و عملوا مدرجات كبيرة لملعب الكورة اللى هوه احسن من كتير من ملاعب بيتعمل عليها ماتشات الدورى بتاعنا

يعنى فعلا حصل اضافة كبيرة للمنصورة من الملاعب و الامكانات دى

همه صحيح غلوا علي طلبة تجارة المصاريف من 100 جنيه سنة 2000 الى حوالى 460 جنيه الوقتى علشان اسبوع شباب الجامعات و مش راضيين ينزلوا المصاريف حته بعد ما الاسبوع خلص بسنتين

و صحيح لو كان المبالغ الجبارة دى اتصرفت على التعليم اللى هوه الغرض الاساسى للجامعة كان الموضوع بقه احسن
او على الاقل كانوا افتكروا الطلبة الغلابة بميت جنيه و جابوا لهم مروحة سقف صينى بدل مايموتوا من الحشر اللى بيبقى فى المدرجات

و بدل ماكانوا يحوطوا كوم زبالة بسور و يحطوا فيه شجر علشان الريس لما يعدى يقول عليها جنينة كانوا شالوا الزبالة

و بدل ماكانوا يرصفوا الشوارع و الحفر لسه مخلصش علشان الريس يعدى و بعدين يحفروا تانى علشان يكملوا كانوا يرصفوا مرة واحدة

لكن بعد ماشفت الصور دى لالا

الواحد يحمد ربنا على اللى هوه فيه

الزعيـمة يقول...

يا ربيييييي

بطني اتقلبت لما شفت الصور
!معقولة دي اماكن يعيش فيها بني آدمين؟

دنا لو بربي كلب والهي ما اقعده
فى حتة كدا .. والطلبة ساكتين لية؟

وبعدين لية دورات المياة مش نظيفة؟

فية جزء غير آدمي فى المكان نفسة والاثاث وجزء مختص بالطلبة
لانهم برضة المفروض يجيبوا حد ينضف الحمامات دي والحاجات الوقعه تحت السراير ما يلموها ويحطوا ملايات على السراير ولو من بيوتهم

مش بنكر ان فية اهمال من الحكومة
بس برضة يقدر الطلبة يحسنوا شوية مكان حياتهم مش بعدم النظافة يزودوا المشكلة

يجيبوا ملايات نظيفة لغرفهم
ويلموا من بعضهم يجيبوا مطهرات وديتول ومية نار ويعطوا الفراش فلوس ينسفلهم الحمام


دا بجد كدا ممكن يجيلهم مرض

بيجاسوس المصرى يقول...

انا ضفت مدونتك عندى لزيارتك دائما يا ابن ناصر

ibn nasser - ابن ناصر يقول...

لشرفت يا نيكولاي جوجول وشوفت كل حاجه بتتحط في الاماكن الغلط مش يصرفوها علي رأيك علي الطلاب علي الحاجات المفيده الأول الحاجات الاساسيه ماشي ملاعب وكل ده حلو لكن دي جامعه مش نادي !!! والتعليم أولي
تحياتي

ibn nasser - ابن ناصر يقول...

هاهاها شوفتي يا زعيمه انتي علي فكره ضحكتين بتقولي ماتخليش كلبك يقعد فيها أقولك المفاجأه بقي الصور دي صور مسكن الطالبات ...البنات مش الأولاد ..شوفتي بقي ويا تري هاتعملي ايه لو كنتي روحتي هناك مثلا !؟؟
وشكرا لزيارتك

ibn nasser - ابن ناصر يقول...

شكرا لك يا بيجاسوس ,, وأتا ضفتك عندي وهازورك باستمرار انشاء الله

ROMIL يقول...

ibn nasser- ابن ناص

بما أني طالب جامعي منوفي
ممكن أقولك أن فيه أكتر من كده وأساسا لحد دلوقتي أدعي أنه لا يوجد تعليم في المنوفيه
وعمار ياريس

ROMIL

ibn nasser - ابن ناصر يقول...

شكرا يا روميل علي مداخلتك القيمه يعني عندنا شهاده أهو من هناك لحسن بيتهموا البلوجرز بالكذب اليومين دول وفعلا عمار يا ريس ..بس عمار أكتر من كده ايه ..كفايه لحد هنا

واحـــد مـــــن الـنـــاس يقول...

انتو هتتامرو كمان
مش كفاية بتتعلمو وبتاكلو وتشربو على حساب الدولة

اخص عليكو يا شعب نمرود


..
انا اتخيلت ان الريس شاف البوست بتاعك ورد فيه :)

ROMIL يقول...

على فكره نسيت أقول حاجه
الصورتين التاله والرابعه تدين الطلاب مش الحكومه أو الجامعه
وده لا يناقض ما قلته في التعليق السابق ولكن لأن الخطأ مركب لا حكومه صح ولا حتى طلبه صح
وعمار يا ريس

ROMIL

غير معرف يقول...

لما شفت الصور فكرتنى بالمدينة الجامعية للطالبات بتاعت جامعة القاهرة
قعدت فيها أربع سنين

علشان أخد دش سخن فى عز الشتا القارص
كان لازم اتنقل من مبنى لمبنى فى عز الليل والبرد
واستنا دورى على باب الحمام
وبنات المبانى التانية بيتأمروا على اللى جابونا بما اننا دخلاء
وانت وحظك بقا
يا السخان يتملا وتنعم بنص شاور دافى
أو يخلص على راسك وتلسعك كرابيج المية المتلجة وأمرك لله
وينتهى الأمر بيك لزكام ونزلة شعبية طول السنة الدراسية
أنا كنت بأوفر على نفسى وكنت أروح عند عمتو لما أحب أستحمى
رخامة بقا

فى المطعم وقت وجبات الغدا
كانت العاملات اللى بيوزعوا علينا الغدا والمشرفين بينقوا صدور الدجاج وقطع اللحم الكبيرة النضيفة خالية الدهن ويركنوها على جنب هى والفاكهة المتنقية عالفرازة
علشان لما يقعدوا يتغدوا هم كمان
اومال اية؟
كان الاكل زى اللى متاكل قبل كدة
دة غير ان اللى بيعطيك الأكل فى السيرفيس بيرميه فى وشك زى ما يكون بيتجبى عليك بيها أو كأنه مطلعها من جيبه أو مستهين بيك وبيقولك بالمتغطى اطفح دة ميجيش حق الشهر اللى انت بتدفعه

لو اشتكيت طبعا اللى بيعمل كدة بيتجازى صوريا أدامك بس
تانى يوم يرجع مكانه تانى ويفرض سطوته عليك أشد من الأول

دة غير سيطرة عاملات النضافة على الدور اللى انت ساكن فيه ولازم تعطيها الجبنة والزبادى والحلاوة الطحينية اللى عندك كل يوم الصبح
ماعرفش بيعملوا بيها اية
بس كان فرض ولازم

نفس الصور بتاعتك دى كانت متوفرة وبكثرة فى مدينة طلابية مركزية وكبيرة زى جامعة القاهرة كدة
لكن مكانش لينا الحق اننا نتكلم
دة كل الحكاية كانوا تلاتين جنية عمى اللى بندفعهم كل شهر
حتتأمروا بيهم كمان؟؟

مع العلم ان كل مصروفات الجامعات والتعليم العالى فى مصر من جيب اليونسكو
الدولة مبتخسرش فيها الربع
لكن تقول اية؟؟
لاااازم الحصة تعدى على جيوب الكبار

ابتسم
أنت فى مصــــــــــر

ibn nasser - ابن ناصر يقول...

الي واجد من الناس
-(اللي في الحقيقه الريس)
معلهش يا ريس احنا أسفين احنا شعب طوول عمرنا كده شعب نمرود فعلا احنا اتجننا عايزين نتعلم وعايزين ناكل وننام ,,معلهش حقك عليا المره دي ..
وتحياتي - مش للريس طبعا- ليك

ibn nasser - ابن ناصر يقول...

باقولك يا روميل كلامك صح لو الطلاب اللي عملوا فيها كده لكن هما أستلموها كده من الجامعه!! يبقي ايه زمبهم بقي !!

ibn nasser - ابن ناصر يقول...

شهروزه
اللي انتي بتقوليه ده مصيبه حقيقيه يا نهاري و جامعة القاهره!!!ده انا مثلا لو كنت كده متحماش احسن !! بدال العذاب ده !! ولا ليه بلاش تعلييم!! ومنوراني علي طوول
شكرا

ibn nasser - ابن ناصر يقول...

معلش يا جماعه الناس اللي علقت ومظهرتش باين كان فيه حاجه فالتكنولوجي

شهيدة يقول...

سلام يا ابن ناصر
ايه السؤال الغريب ده؟
الاتنين طبعا

انت شاكك في تقدير الحكومة للطلاب؟! ولا في مستوى تعليم بلدك؟؟ ايه الخيانة العظمى دي

انا حشكيك للريس

ما تسألش أسئلة تافهة كدة بعد الآن

Ahmad Hegab يقول...

انت يعنى لاموخذة متوقع ايه احمد ربنا دا كدا عسل اوى

جبهة التهييس الشعبية يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه


ما هي المنوفية يا حبيبي

يعني مهما تديهم مش ح يبان عليهم

المنوفي لا يلوفي ولو اكلته لحم الكتوفي

انت ناسي وللا ايه

-_- يقول...

انا دلوقتى عرفت احنا ليه مأخدناش ولا مركز في احسن 500 جامعة في العالم

هذه الصور قليلة عن ما يحدث في قاعة الطعام


قاعة الطعام تقدم مخلل بالحشرات و فراخ بالدم و رز بالحصى

ملحوظة : مكنتش بهزر في الجملة اللى فوق

ذو النون المصري يقول...

الجاكعات المصريه هي الاخري لا تحترم حق الانسان في الكرامه و العيش بلا ذل
حتي البنات الاستحمام عليهم مش حق
حسبنا الله و نعم الوكيل

ibn nasser - ابن ناصر يقول...

شهيده
هههههه والله أنا خايف يسمعوا منك بجد ويتهموني بالخيانه العظمي وكل ده ان في مرحلة الشك وشوفت صور مساكن الطالبات أومال اعمل ايه عشان ابقي في اليقين
وشكرا لكي

ibn nasser - ابن ناصر يقول...

ahmed_h
فعلا ماهو زي ما قولت فوق احنا شعب واطي لازم نحمد ربنا اننا عايشين ...مع اننا عايشين جسما فقط لكن حقيقي لأ..
وشكرا علي مداخلتك اللطيفه

ibn nasser - ابن ناصر يقول...

جبهة التهييس الشعبيه
هههههههه تصدقي نسيت لكن ده المشكله ما بقيتش في المنوفيه بس دي بقت في كل حته ,,لكن الا المنوفيه ديه أه منها
وشكرا لكي

ibn nasser - ابن ناصر يقول...

شارم
هههههه طب قوللي يا تري ايه طعم مخلل بالحشرات ,,, وعلي فكره انتوا شعب ياكل وينكر ده الحشرات بتتقدم في مطاعم عالميه بأسعار غاليه بتنكروا الهنا اللي انتوا فيه ....
يا سلا م فراخ بالدم ايه الطعامه ديه ..اخص عليكو شعب ,,هههه
شكرا لك

ibn nasser - ابن ناصر يقول...

ذو النون المصري
حتي الجامعه مابتحترمش الانسان ,طب هو ايه في مصر بيحترم الانسان قولي عايز أعرف ... وبكره نطلع شعار (الاستحمام حق لكل طالب وطالبه ) ... ومظاهرات وايه
شكرا لك

غير معرف يقول...

السلام عليكم

اسمحلى استعير عنوان البوست بتاعك اللي فات
"لا تعلــــــــــــــــــيــــق

واحمدوا ربنا بقي إنهم مستحملين بشر زينا يعيشوا علي أرض الوطن ..ماهو مش حيبقي أكل وبحلقة

Ana mosh sa3eed. يقول...

this is just a part of the whole picture ...that really REALLY sux thes days. I can't stand it any more wallahi !!! sorry no Arabic keyboard.
bas besara7a bravo 3aleek......a7yanan elsewar afdal min 1000 ta3leeq.
shofeetom ;)

ana elmasry....ana mosh sa3eed

Egyptian Falcon الصقر المصري يقول...

ياابن ناصر ياأبهة، إيه العظمة دي كلها؟ :)

حقيقي عجبتني مدونتك جداً وقريت فيها موضوعات كتير وكلها مهمة وبتناقش موضوعات في الحقيقة أس كل البلاوي اللي في البلد. الميزة الأساسية في موضوعاتك انها بتكشف كذب النظام وضلاله وفي نفس الوقت بتنور العقول الضلمة اللي منتشرة حوالينا

الحقيقة انا باشكرك جداً على زيارتك مدونتي وتعليقك الجميل فيها، واتمنى دوام التواصل بينا. أنا شخصياً بعد ماقريت موضوعاتك قررت اضيف مدونتك لقائمة المدونات اللي باقترحها على زواري عشان يستفيدوا منها زي انا مااستفدت

بالنسبة لموضوع الجامعات ومساكن الطلبة، طبعاً انا مش حااقدر اضيف حاجة للي قالوه زملائي اللي قريت تعليقاتهم على الموضوع. بس عندي سؤال للأخوة بتوع النظام وزبانيته، إزاي عايزين البلد يبقى فيها نظام ونضافة وذوق والحكومة بتربي النشأ الجديد على القذارة والحقارة وقلة الذوق والآدمية اللي واضحة في الصور دي؟ الحالة السيئة دي مش بس في جامعة واحدة ولا مدينة طلبة وبس، الحالة دي في كل المصالح والهيئات والمباني الحكومية لا يستثنى منها واحدة

أما الأخ العزيز روميل، فأحب اقوله إن من غير المعقول اني ألوم شباب صغير عنده من 16 لـ22 سنة على إنه مانضفش وماهنظمش اللي النظام القائم على الحكم من 25 سنة مبهدله. الشباب ده شباب في معظمه غلبان ماعندوش إمكانيات مادية متاحة وبتعضله مصاريف التعليم - المجاني!!! -والإنتقال أساساً وأكله وشربه البسيط وفيهم ناس بيعيشوا على طقة فول واحدة في اليوم. غير كده وكده، الشباب ده نفسه اتربى من الحضانة لحد مادخل الجامعة في حضانات ومدارس الحكومة اللي طبعاً حضرتك وباقي الإخوة المعلقين يعلموا تماماً أنها لاتقل قذارة ولاآدمية عن مانراه في الصور اللي في الموضوع. يعني الشباب ده وللأسف من ساعة مااتولد لحد مادخل الجامعة اتأسس جواه ان هوه ده الطبيعي وإن المناظر اللي بننتقدها دي حاجة عادية وطبيعية جداً وان مافيش في الدنيا احسن من كده وبالتالي لابيشتكي ولابيتمرد، ولما بيسمع أو يشوف حد بينتقد الأوضاع دي بيستغرب ويدخل في حالة صدمة لأنه ماكانش متوقع ان اللي حواليه ده غلط ولا إن ممكن يكون فيه غير كده

وطبعاً ياأخي العزيز وياباقي إخواني الأحباء الشاب ده لما يتخرج من الجامعة ويعمل - ده طبعاً من المستحيلات - عمره ماحايحاول تغيير الأوضاع القائمة دي مهما شاف أو سمع

الحقيقة ان المفروض الأسس الآدمية والإنسانية العالمية يبدأ تطبيقها منذ ولادة الطفل في المستشفى الحكومي الذي يولد الطفل به، في غرفه، وعياداته، ومعامله والأهم في دورات مياهه ياسيدي.
ثم الحضانة ثم المدرسة وفي نفس الوقت في المصلحة الحكومية التي يطرقها الأب أو الأم لحاجة وهكذا، حتى ينشأ نشأ جديد لم تر عينه ولم تتعود هذا المستوى السيء واللاإنساني

شكراً لك يابن ناصر على إتاحة الفرصة دي ليا وشكراً لكم جميعاً إخواني وأخواتي في البلجرة :)

ibn nasser - ابن ناصر يقول...

mesh2dra
طبعا احنا بنحمد ربنا علي كل حاجه لكن المشكله ان التاس تقولك مستور والحمدلله ماهو احنا عايشين اهو يا باشا ,, وكلام من ده يعني ايه عايشين ومستوره هما عيازنهم كمان يطلعونا من بيوتنا ويقتلونا يعني !!! ده ولا الاحتلال امتي الشعب يفووق؟؟؟
وأشكرك

ibn nasser - ابن ناصر يقول...

el masry
فعلا أحب أقولك ان الصوره احسن من الف تعليق فالصوره تتكلم افضل من أي شيء ,وساعتها ولا يقولك انت كذاب ولا غيره ..
وشكرا لك

ibn nasser - ابن ناصر يقول...

الصقر المصري
اولا أحب أشكرك علي مداخلتك العميقه
وانا علي فكره ضفتك عندي برضه ,, واحب اقولك اني مش مختلف معاك خالص فعلا كلامك كلو صح ,, فهما جوعونا -دي سياستهم- حتي تطالب بالطعام لكن لو اكلونا وشربزنا هيجي الشعب يقولك السياسه ديه ايه ومش عارف ايه لكن طول ماهو جاعان وتعبان عايز ياكل وينام بس
وشكرا لك

IBN BAHYA - إبــن بهيـــــــــــــة يقول...

فيه إيه يا ابن ناصر بس؟

ليه يا أستاذنا العكننة دي بقى ؟ مش كنت تسكت وتخلينا في همنا زي ما بيقول عمك أمين الديب في قصيدة الطواريء التي سجنته ؟

والله مش عارف أقولك إيه ؟
يالا نصرخ مع بعض

ألحق أقولك أرق تحياتي
قبل ما نصرخ بقى

ibn nasser - ابن ناصر يقول...

ابن بهيه
حبيبي والله مش عارف اقولك ايه ,,بس هانصرخ ازاي مافيناش حيل ممكن نصرخ ..نصرخ ...لكن بلا صوت..
لك اطيب التحيات

Memo يقول...

allah aih el7lawa dih
elmfrod el3ial tmsk nfsha ba2a l7ad matrg3 bldha 3shan t7'sh el7mam
kathom elaraf
ta7iatshy

ibn nasser - ابن ناصر يقول...

memo
تمسك نفسها وبس,,لأ وتنام وهي واقفه لو نامت اصلا
تحياتي

غير معرف يقول...

برافوا عليك اوي انك قدرت تصور الصور دي اصلها مانتا فاهم بلد الرئيس واولاده فقط لا غير ياريت تبقي تشرفني علي مدونتي

ibn nasser - ابن ناصر يقول...

اول حاجه لو سمحت ماتغلطش البلد مش للريس ولا لولاده بس للحاشيه بتاهعته كمااان,,صح ولا كلامي في حاه ,, وماشي هاجيلك عندك دلوقي
ومرحبا بك في أي وقت

ROMIL يقول...

أنا بعترض على كلام

جبهة التهييس الشعبية

من الواضح أنه بيهيس فعلا وبيقول أي كلام
أنت كده غلط في المنايفه كلهم

ROMIL

ibn nasser - ابن ناصر يقول...

ههههههاههاهاهاهاهه
حقك عليا يا روميل ,بس يعني احنا معذورين من اللي شوفنا من النايفه يعني كتير ,,اعذرناو معلش أنا مقدرك..

الدبور يقول...

في كام صورة علب البيبسي و ازايز المياة المعدنيه مرميين في الارض و خلينا موضوعيين مش الحكومه هتجيب واحد من البلديه علشان المواطن يكلف نفسه يشتري كيس بشلن و يرمي فيه الحاجات دي
نيجي بقي للنقطه التانيه طبعا حمامات و غرف النوم غير اداميه
وبالنسبه لل120 مليون انت باين عليكي طيب اوي كان بان علي الاوض اي حاجه او الحمامات
عمار يا مصر

تحياتي
الدبور

ibn nasser - ابن ناصر يقول...

دبور
اول حاجه مرحبا بك تاني حاجه بلدية ايه تخيل انت تعرف تنام علي السري ده تيجي تفتح الدولاب تلاقي المنظر ده تيجي تخوش الحمام كده وكل ده مسكن للطالبات,,ايه بعد كده بعدين أنا طيب فعلا ,بس مش أوي كده يعني...
ونورت وابقي شرفنا هنا
تحياتي

kaed يقول...

عزيزى إبن ناصر
طالما ساعة الزيارة بتاعة مبارك كلة تمام يبقى خلاص الموضوع إتحل و الكرسى حيفضل موجود و أهم حاجة رضا الريس و سلملى على الآدمية و التعليم و حقوق الطلبة و الكلام الفاضى دة

shady يقول...

شه غليت انت فاكر 120 مليون دول يعملوا حاجه دلوقت هههههه

خلاص بكره يخصخصوها وحتروق وتحلى وولاد الكلب مصيرهم الشارع وولاد الباشا مصيرهم يختاروه

.:.-=- ELGaZaLy-=-.:. يقول...

الواحد قرف من البلد دى بجد واتخنق مش عارف هايعملو فيها اكتر من كدة اية

ibn nasser - ابن ناصر يقول...

kaed
فعلا كله تمام يا باشا والشوارع اتقفلت والناس حالها اتوقف وكله خراااب,,قصدي كله تمام والباشا عده خلاص,,
تحياتي

ibn nasser - ابن ناصر يقول...

شادي
فعلا بكره كولو هيتحل وولاد الشعب الفقير الكلاب هيترموا في الشارع وولاد الذوات مكانهم فيها ,,بس هما فاضل ايه يمصمصوا ,قصدي يخصخصول لسه مخصخصوش البني أدمين ,أصل مالهومش تمن
تحياتي

ibn nasser - ابن ناصر يقول...

ghazaly
والله يا غزالي هو ده اللي أنا قولته هيعملوا اي أكتر من كده ؟؟؟يعني انت عارف مثلا لو خيانه وعماله لبره,وفي تعليم ومفبش فقر كنا قلنا مساكين لاكن في فقر وفي هبر ..والنبي كنت عايز سيخين عز الدخيله,,,
تحياتي

كلبوزة لكن سمباتيك يقول...

كما قال الخواجة بيجو
دي حاجة حلوة خالص
امضاء
خمسة عكننة

Radwa يقول...

انتو ايه ما بتحسوش خالص عايزين ايه اكتر من كده هتنهبوا يا ساتر يا ساتر يا ساتر حرام عليكو سيبوا الاغنيه الغلابه الحراميه يسرقوا براحتهم وانتو خدو الفكه اللى تفضل وبعدين هو ايه

حجة البليد مسح الديسك التخته ولا ايه اللى عايز يزاكر هيزاكر لو فين بس دى كلها حجج فاضيه

يعنى انتو فاشله وحاقدين كمان على الحكومه وشويه الملايين اللى بتسرقها سورى قصدى الملاليم اللى بتاخدها اعانه



انا مش فاهمه انت زعلان ليه لما انت عايز تعيش فى مدن طلابيه كويسه جمال وعلاء يعيشوا هما فى العشش عايزهم يخصصوا فلوس علشان يعملوا مدينه طلابيه كويسه قابله للاستخدام الادمى تتكلف بتاع كام مليوم ولا مليار وهما يشحتوا خساره يابنى ولاد حسنى اولى بخير البلد انت تدفع وتسكت وبس

يا شعب ظالم

35L يقول...

السلام عليكم.....لقد افتتحت مدونة جديدة.....رجاء الاطلاع عليها و ترك تعليقات حتى أعرف هل أستمر أم لا؟.....أنا لست مدون جديد....و لكنى أغير وجهتى فى الكتابة.....شكرا

أميرة يقول...

ابن ناصر

اولا شكرا لزيارتك الجميلة لمدونتك

فكرتنى باسبوع شباب الجامعات 2005 كان فى المنصورة

كان اسبوع اسود ماطلعتلوش شمس

تحياتى ليك

Tamer Nabil Moussa يقول...

البلد خلاص علية العوض فيها

بسبب الحرامية الموجوين

تخد منهم كلام عن احلام لاتتحقق

تنزل للواقع تشوف حاجة تانية

MAKSOFA يقول...

والنبي قلبي بيوجعني علي المستوي الا أدمي اللي وصلنا ليه
للك الله يامصر

علي فكره
انا كنت ناصريه زمان وانا قدك كده بس تبت

ibn nasser - ابن ناصر يقول...

sampateek
فعلاالخواجه بيجو ينفع اليومين دول كان زمان الناس بتضحك علي كلامه ..! دلوقتي كلامه هو المنطقي!! صح
تحياتي

ibn nasser - ابن ناصر يقول...

sendrlla
شعب مافيش فايده فيه أناني جدا فين الذوق وفين التكاتف والاجتمعي مع بعض شعب, شعب عايز ياكل وينام ويتعلم نعملوا كل الحاجات ديه ومش عاجبه !!!اما شعب
خالص تحياتي

غير معرف يقول...

أخي ابن ناصر
تحياتي لك وشكرا لك على تشريفك لمدونتي المتواضعة
تحياتى على مدونتك الجميلة
البلد يا أخي فيها أكتر من كده بكتييييير وللأسف الواضح إن إللي جاي أسوء من إللي فات
تحياتي وسلااااااامي لك وأرجو أن نكون على إتصال دائماٌ
ولك أهدي القصيدة التالية لأحمد مطر

أنا السببْ .

في كل ما جرى لكم يا أيها العربْ .

سلبتُكم أنهارَكم والتينَ والزيتونَ والعنبْ .

أنا الذي اغتصبتُ أرضَكم وعِرضَكم ،

وكلَّ غالٍ عندكم

أنا الذي طردتُكم من هضْبة الجولان والجليلِ والنقبْ .

والقدسُ ، في ضياعها ، كنتُ أنا السببْ .

نعم أنا .. أنا السببْ .

أنا الذي لمَّا أتيتُ : المسجدُ الأقصى ذهبْ .

أنا الذي أمرتُ جيشي ، في الحروب كلها بالانسحاب فانسحبْ .

أنا الذي هزمتُكم

أنا الذي شردتُكم

وبعتكم في السوق مثل عيدان القصبْ .

أنا الذي كنتُ أقول للذي

يفتح منكم فمَهُ : " شَتْ ابْ " !.

نعم أنا .. أنا السببْ .

في كل ما جرى لكم يا أيها العربْ .

وكلُّ من قال لكم ، غير الذي أقولهُ ،

فقد كَذَبْ .

فمن لأرضكم سلبْ .؟!

ومن لمالكم نَهبْ .؟!

ومن سوايَ مثلما اغتصبتكم قد اغتَصبْ .؟!

أقولها صريحةً ،

بكل ما أوتيتُ من وقاحةٍ وجرأةٍ ،

وقلةٍ في الذوق والأدبْ .

أنا الذي أخذتُ منكم كل ما هبَّ ودبْ .

ولا أخاف أحداً ، ألستُ رغم أنفكم

أنا الزعيمُ المنتخَبْ .!؟

لم ينتخبني أحدٌ لكنني

إذا طلبتُ منكمو

في ذات يوم ، طلباً

هل يستطيعٌ واحدٌ أن يرفض الطلبْ .؟!

أشنقهُ ، أقتلهُ ،

أجعلهُ يغوص في دمائه حتى الرُّكبْ .

فلتقبلوني ، هكذا كما أنا ، أو فاشربوا " بحر العربْ " .

ما دام لم يعجبْكم العجبْ .

مني ، ولا الصيامُ في رجبْ .

ولتغضبوا ، إذا استطعتم ، بعدما

قتلتُ في نفوسكم روحَ التحدي والغضبْ .

وبعدما شجَّعتكم على الفسوق والمجون والطربْ .

وبعدما أقنعتكم أن المظاهراتِ فوضى ، ليس إلا ، وشَغَبْ .

وبعدما علَّمتكم أن السكوتَ من ذهبْ .

وبعدما حوَّلتُكم إلى جليدٍ وحديدٍ وخشبْ .

وبعدما أرهقتُكم وبعدما أتعبتُكم حتى قضى عليكمُ الإرهاقُ والتعبْ

شاعر الحرية أحمـــــــد مطر

ibn nasser - ابن ناصر يقول...

35l
ساتصفح مدزنتك وسأقول رايي بصراحه ,,وابقي تعالي زورنا
نورت

ibn nasser - ابن ناصر يقول...

اميرة ويلز
اه مانا عارف بس أصلهم في فنون الأي بيتطوروا كل سنه حاجات وافكار تانيه ,,وماتشكورينيش مدونتك هي اللي تستحق الزياره وابقي شرفي علي طول
تحياتي

ibn nasser - ابن ناصر يقول...

tamer
فعلا كلامك مظبوط هما كده كلام كلام ولا افعال بل أفعال مضره كما
شكرا ونورت

ibn nasser - ابن ناصر يقول...

maksofa
ايوه اومال ايه بشوات في معاملة اللا أدميين ,,
وعلي فكرة انتي بتقولي كنتي ناصريه وتبتي ,,في 72 مصري بيفكروا يتوبوا خالص ومايبقوش مصرين
شكرا

ibn nasser - ابن ناصر يقول...

اهلا بيك يا أفندينا وماتقولش كده مدونتك حلوة وانشاء الله نكون علي اتصال دائما وبالنسبه لقصيدة احمد مطر روعه وانا علي فكره ناشر له قصيده في مقالة فنون التعذيب
ونحياتي

Music Gates يقول...

مش عارف ليه كل ما بشوف حاجه من دي بيزدني غضضب شديد انا بجد تعبت من الحكومة و الكلام الي بيقوله عكس الواقع و نحن ااقمنا و نحن انجزنا ربنا يخلصنا من الحكومة دي علي خير

ibn nasser - ابن ناصر يقول...

copa
اهلا بيك دي اول حاجه تاني حاجه ربنا يخلصنا من الحكومه دي والا النظام ده ونرتاح خالص ,,,امين يا رب
تحياتي