أخبـار ابـن نـاصر

لا للتعديلات الدستورية

الأحد، ١٥ أبريل ٢٠٠٧

حواري مع رجل الحزب الوطني (تختار الكوكا كولا ولا الكرامه!؟)




طبعا ماتتخيلوش انا الرجل ده نرفيزته ازاي وقاللي قوم امشي انت باين عليك جاي تهرج ...!!!! بدأ حواري مع عضو في الحزب الوطني بفتح موضوع إيران بالصدفه وسؤالي له عن ما يتوقعه من تطورات في التحدي الايراني- الغربي وصراع نجاد لامتلاكها الطاقه النوويه وقاللي انها هتنضرب ماحدش يتحدي العالم قولتله يعني هنصحي في يوم الصبح هنلاقي ايران اتضربت ونجاد هيقول خلاص يا جماعه انا سلمت قاللي! لأ قبل ماتنضرب هيقولك مفواضات ويفتحوا الباب لوكالة الطاقه الذريه والتفتيش والكلام ده والرجل ده -قصده علي نجاد- هيودي بلده في دهيا وفي الخراب زي العراق عامل نفسه جدع واديه الشعب اتقلب عليه فقلتله بصدق وبرود شديد وكانه نابع من قلبي كان لازم يقتدي بالرئيس حسني مبارك رجل الحرب والسلام قاللي طبعا! ..طبعا الراجل ده عظيم ده عمره ما دخل مصر في حرب قلتله طبعا الحرب خراب بتوقف البحث العلمي علي سبيل المثال بتقتل الاقتصاد فالجيش بيبقي واخد الاهميه فانت هتودي الناس لجيش ولا هتخليهم بحث علمي واحنا ماشاء الله اقتصادنا قوي جدا والبحث العلمي علي اقوي مستواياته ومتنساش ان الريس هو اللي جاب طابا وبعدين مش رجل سلام بس ده راجل حرب حارب وانتصر وطبعا وانا بقول الكلام ده ونفسي افتح دماغه وهو قاعد يعملي برأٍسه ومبسوط قوي وقاللي طبعا طبعا وماخدش بالو اني بتريق وقالي انت متعرفش يعني ايه حرب ماتتخيلش اما كنا بندهن الزجاج باللون الزرق ومتعرش كان ايه هي مني وتمنيات كل واحد؟ فسألته ايه قاللي ان الواحد يشرب ازازة كوكا كولا! مافيش الكلام ده وقاللي انه فاكر واحد قريبه لحد دلوقتي اما كان مسافر لندن وجه وكان جايب معاه صندوق وقاللي تخيل جايب فيه ايه؟ وقام رادد علي طول ماسبنيش اتخيل حتي! وفال كان جايب معلبات وكوكاكولا ولبان وكده.. قولتله يعني اقدر اقول ان وجود الكوكاكولا دي من انجازات الريس بصلي كده نظره ناريه قلتله بتكلم بجد وكان واحد قاعد معانا تبعي قاللي وكمان الشوكالاته مكنش فيه زمان قلتله صح يعني انزل اي محل في مصر هتلاقي كل انواع الشوكلاتات الموجوده ده في منها اللي بيمط في البق والي بيعمل لون واللي عليها شكل ودي مكنتش موجوده شفت بيدلعوه الشعب اازاي! قام متنرفز وقاللي انت جاي اتهزر بقي يا حبيبي وانا اضحك من خارجي... وداخلي ابكي فعلا وبقول لنفسي تغور الكوكا كولا تغور الشوكلاته بس نبقي عندنا كرامه ..فانا انسان بلا كرامه واعترف انسان استطيع الحصول علي الكولا والشوكولاته لكن هل استطيع ان احصل علي كرامتي؟؟..واتذكر في ذهني محمد خلف الذي احيل الي المحكمه العسكريه واخذ ستة اشهر وهو مريض في المستشفي الان ولا اعرف حالته وكل هذا لانه لا يريد حراسة السفاره الاسرائيليه,او المواطن المصري الشريف رضا اللي اتهمته السفاره الامريكيه بخطف كيثي المواطنه الامريكيه (اللي هي مراته), -فكرامة المواطن من كرامة الوطن- وقاله الراجل اللي في السفاره الامريكيه .انت مصري...يعني ولا حاجه!! .... وارجو ان يرد كل من يقرا هذا الموضوع


علي كلامي بإجابة السؤال التالي كوكاكولا ولا كرامه ..!!؟


وفي ناس هاتختار كوكاكولا اقسم بذلك




أيهما تختار وبصدق ؟؟


........................




تحياتي


ابن ناصر

هناك ٦٠ تعليقًا:

مصر هى أمى يقول...

ابن ناصر

فى الاول كنت فاكرك بتهرج انك قاعد مع واحد من الحزب الوطنى وانه عمال يمجد فى الانجازات

بس فى اخر البوست لقيتك بتتكلم بجد
بجد لسه فى حد بيمجد فى انجازات الحزب الوطنى دا حتى لو هوا منافق مفروض يتكسف على دمه ويسكت كلام النفاق ده يقوله فى الجرايد علشان حد يشوفة ويقوم مرقيه فى الحزب لكن فى قعدة عادية مفروض انه يسكت او يقول حقيقة الزمن المنيل ده

ازازة كوكا كولا ياااااااااه ديه اقصى امانيه طب اخواتنا اللى ماتوا فى حب 67 وحرب 73 ماتوا علشان خاطر باكو تشكلتس ولا ايه
حرام نضيع دم الشهداء هدر فى امنيات بالمنظر ده

ibn nasser - ابن ناصر يقول...

مصر هي أمي
هههه والله بتكلم جد ,, دول ناس غريبه جدا جدا ,واراهنك في ناس هتختار الكولا ,وبعدين شوفت يا عم عبدالله كمال والحرب اللي فاتحها علي هيكلعشان قال شادة حق !!
تحياتي

قنديل يقول...

بين كولا السفــهاء وكرامة الشرفـاء
عرفت الجــــدع واللي بيقـول مـااء
وحلفت أموت نضيف ولا أكون من العملاء
فهم كالخنــازير يعيـــشون في خـراء

آآه يا قلبي

ibn nasser - ابن ناصر يقول...

أه يا قنديل
والله موجوع قوي ..
ربنا يصبرنا يا شاعر المدونات

مراقب مصري يقول...

لا كرامة لشعب بلا كوكاكولا... مش عارف إنت مصر ليه تخيرنا بين الاتنين في حين أنهما لا يفترقان بعضهما عن بعض... الكوكاكولا هي التطور الطبيعي للكرامة... أقول لك الدليل... زمان كان رمز الكرامة إن عبد الناصر يقول لك إيه؟ أيوااااا صح!! إرفع رأسك يا ابن عمي... وحضرتك لما بتشرب إزازة الكوكاكولا أول حاجة بتعملها لما بق الإزازة بيبقى على بقك هي إيه؟ أيوة صح برافو عليك بترفع رأسك يا أخي وتحدفها على ورا عشان يتدفق شلال الكوكاكولا من عنق الزجاجة إلى سقف حلقك عِدِل... يبقى الكرامة والكوكاكولا مرتبطين إرتباط شرطي بقى ولا لأ؟؟؟

وبعدين الكوكاكولا لما بتشربها يبقى إنت بتنفَّع مين؟ صح أمريكا الإمبريالية اللي هي مع قمع البشر في العالم وسحقهم بتهمة إنهم محور الشر ولما بتشتري "الكرامة" بتنفَّع مين؟ أيوة صح... حمدين صباحي اللي بيقبض من ليبيا والعقيد اللي برضه مع قمع البشر في بلده وسحقهم بتهمة أي حاجة في البطيخ... يبقى فيه ارتباط ولا لأ؟؟؟

لا يمكن الفصل بين الكرامة والكوكاكولا على الإطلاق ورجاء أن تعيد نظر في رأيك وبلاش تخير الناس بين الكرامة والكوكاكولا لأنهما صنوان لا ينفصمان... وشكرا

ibn nasser - ابن ناصر يقول...

ايه ده تصدق انا صدقت..اه يعني هم زمان كان عندهم كرامه احنا دلوقتي عندنا كوكا كولا ده تتطور عادي يعني
تحياتي

Azza Moghazy يقول...

كرامة ايه يعنى
معلش المسالة محتاجة توضيح
طب ممكن ترجمة لو سمحتم
طب هى موجودة فى القاموس باى لغة
معلش مش عارفة اعلق الا اما افهم بتتكلموا على ايه الاول

غير معرف يقول...

:(

غير معرف يقول...

طبعا مش هختار كوكاكولا ولسبب واضح وصريح لان كوكاكولا مفيهاش صودا فسوف اختار بدورى بيبسي :))))))) هم يبكي وهم يضحك والله


عظيم يا بن ناصر واعزرني لاني خلاص اتجننت من البلد ده

BeLiEvEr يقول...

ما ينفعش أستعين بصديق فى الغجابه على السؤال ده؟
:)))

ibn nasser - ابن ناصر يقول...

واحده وخلاص
,,للأسف بدور علي قاموس او حد يفهمني مش لاقي..
تحياتي

ibn nasser - ابن ناصر يقول...

نور العظماء
, ههههها يعني اخترت بيبسي ,,,طب والله كويس لكن انا لو منك كنت اختار فيروز تفاح !!!
لأ ماهو لازم تضحك ,لو مضحكناش هنموت
تحياتي

ibn nasser - ابن ناصر يقول...

believer
عايز تستعين بصديق ..؟ لأ انا ممكن احزفلك اجابتيت ,
تحياتي

ibn nasser - ابن ناصر يقول...

ههههههههههههه هو في يا جماعهمحدش عارف يعني ايه كرامه .....كرامه مين كرامه ده !! مش مهم

غير معرف يقول...

طبعا الحزب الحاكم هايختار الكوكا لان الكوكا بتمثل لهم مصدر الجبروت والحفاظ على العرش
كرامه ايه هما عندهم اصلا كرامه لو حتى واحد فيهم عندوا كرامه كان نزلو عند اراده الشعب وكرامه الشعب من كرامه الحكومه والمواطن مطحون ومهان كرامته لانهم داسوها هنا
تعرف تقول كوكا كوكا خلصت الحدوته

شهيدة يقول...

انا حتقيد بشروط التعليق عندك وأقول
كرامة



هههههه
طبعا مش حكتفي بالكلمة دي انت عارفني رغاية

طبعا يابن ناصر انا حختار الكرامة، وبعدين أساسا الكوكاكولا مش لذيذة خالص، البيبسي أحسن بالنسبالي
هههههه
بس بجد في ناس بتعظم بعمو حسني بالشكل ده؟
يبقى اكيد في حاجة غلك في دماغك يابن ناصر
ياريت تراجع نفسك
وتدوق الكوكاكولا
مش يمكن وجهة نظر؟
تحياتي

ibn nasser - ابن ناصر يقول...

عمر الشرقاوي
صحيح والله هما عندهم اساسا كرامه .. فمش فارقه معاهم
تحياتي

ibn nasser - ابن ناصر يقول...

شهيده
هههههههههه كوكاكولا ,,اه بس قالوا مافيهاش صوده بس علي العموم نا خاص اقتنعت بان الكرامه تتطورها ككاكولا
تحياتي

Iman يقول...

طب ممكن كرامه بالشوكلاته
اصلى مقدرش ابطل شوكلاته لمجرد انى حسنى مبارك هو اللى دخلها البلد
عموما...انا لو مكانك مكنتش سمحت لنفسى انى ادخل مناقشه مع واحد من زباله الحزب من لاساس.لان الناس دى متبرمجه على الكلام وحفظينه من كتر ما بيقولوه

مش عارفه ايه علاقه الكوكاكولا بكرامه المصرى.....للدرجادى بقت كرامتنا زى الكوكاولا....بتفور
حسبى الله ونعم الوكيل
منكرس انى ضحكت على موضوعك يا ابن ناصر ...تحياتى ليك

غير معرف يقول...

ههههههههههه الكل دلوقتي بيدور علي الكوكولاا اعتقد انه هو كمان عاوز كده مش هقدر اقوللك غير حسبن الله ونعم الوكيل في كل اللي ظلمنا تحياتي ليك علي البوست الرائع ده

ibn nasser - ابن ناصر يقول...

ايمان
مش مهم اه نعمل كرامه بالشوكولاته
عادي !
تحياتي

ibn nasser - ابن ناصر يقول...

فارس
ماشي يا عم ....وعلي العموم ححجزلك واحدة كوكا كولا وانا عرافك كوكاكولاوي كبيير
تحياتي

ShAb 3AdY يقول...

طيب مهو انا مش هختار كوكاكولا عشان المقاطعة

طيب اشرب ايه طيب و هما بيقولو اشرب كوكاكولا

بيبسى بردة مينفعش

خلاص ايه رأيكو نعمل مشروب جديد و نسميه مشروب الكرامة

اكيد هنعرف نعمله بس يا ترى لما نشرب مشروب الكرمة هيبقى عندنا كرامة بجد !!

kaed يقول...

واد يا عسل
إزيك عامل إية واحشنى كتييير واللة
خد عندك بقى
أحنا نعبى الكرامة فى أزايز ونخليها بالصودة مثلا أو بالتفاح ونرسم على الإزازة صورة واحدة مزة و لامؤاخذة عريانة حبتين ونعرض البضاعة بتاعتنا فى السوق و ساعتها كل الناس حتختار الكرامة
شوفت بقى الحل سهل إزاى إنت اللى محبكها حبتين
أخى إبن ناصر
حقولك بيت شعر جامد قالوا الإمام الغزالى
وكان ما كان مما لست أذكرة
فظن خيرا ولا تسأل عن الخبر
يعنى بالعامية
كبر دماغك
إية رأيك بقى

ibn nasser - ابن ناصر يقول...

شاب عادي
يالاهوييييي , هتعموا مشروع مشروب الكرامه ..طب معلهش عندي استفسار هو المشروب ده اللبيشربو يبقي عندوا كرامه!!؟ طب لو بتوع الحزب الحاكم شربووه هيأثر فيهم!!؟
تحياتي

ibn nasser - ابن ناصر يقول...

قائدي
والله حلين مافيش زيهم ولا أحسن منهم .. بتاع كرامه بالصوده وهو الكل هيبقي عنده كرامه .. اما علي شعر الامام الغزالي ,فانا كبرت دماغي لدرجة اني مش عارف اقلع الفانيله ...
تحياتي

جبهة التهييس الشعبية يقول...

لا الكوكا كولا بتخن

الا اذا كانت دايت بقى

هي الكرامة دي طعمها ايه؟

ibn nasser - ابن ناصر يقول...

جبهة التهيس الشعبيه
والله انا ولا بشرب كوكاكولا ,,مافتكرش طعمها ,,ولا عرفت حاجه اسمها الكرامه برضه مافتكرش طعمها
تحياتي

سكوت هنصوت يقول...

الحزب الوطني ده لذيذ جدا والله...المفروض الواحد يقرا مقالات رجالاته دي بدل النكت عالقهاوي...عاملين زي جحا الي ضحك على الناس وشاورلهم على شباك وقالهم دول هيوزعوا لحمة كمان ساعة...فالناس اتلمت على الشباك ووقفت طابور..وبعدين الطابور كبر..حبه وراح جحا واقف معاهم...ابنه قاله انت واقف ليه يا ابا ...قاله يا بني الناس بتقول دول هيوزعوا لحمة...يا عيني...بيكدبوا الكدبة..و من كتر ايمانهم بالكدبه يروحوا مصدقينها...قال انتو اصلكو ما تعرفوش يعني ايه حرب...الحقيقة احنا ما نعرفش يعني ايه حرب لكن اكيد عرفنا يعني ايه السلام...و نفسنا ربنا يتوب علينا منه لحسن حالنا كان ارحم كتير ايام الحرب...مقاله هايلة يا بن ناصر..تحيايت

ibn nasser - ابن ناصر يقول...

سكوت هنصور
اه والله كذبه وصدقوها ..
تحياتي

صاحب البوابــة يقول...

أخي العزيز ابن ناصر

كل مقال تكتبه

يبقى في تاريخك نضالك شاهداً على وقوفك يوماً ما ضد هذه القلة الطاغية

تحياتي لك أخي العزيز

وتحية خاصة لقلمك المبدع

أمــانــى يقول...

السلام عليكم
اها طبعا الكوكاكولا هى الاهم وده اكبر الانجازات
ليه لانهم ما شافوش مصانع تانى ناس غلابة بقى هنقول ايه الله يرحمك يا عبد الناصر الراجل ما خلاش مصانع حديد وصلب وكيماويات وغيره وغيره
اما ده على راي ابراهيم عيسى سياسة المجارى والكبارى هى دى الانجازات
ايه الشعب ده اللى مش بيحسن النعمة
كوكاكولا وشكولاتة وكنتاكى ايه عايزين تانى
وبأكره سم اللى مش مقاطع الحاجات
تحياتى لك يا ابن ناصر

Unknown يقول...

أنا الحمدلله مقاطعه يعني كده كده هختار الكرامه
بقي نجادي هيودي بلده في داهيه؟ أمال احنا بلدنا راحت فين؟
أمريكا مش هتدخل ايران لأنها عارفه انهم عندهم نووي, هي مادخلتش العراق غير لما اتأكدت انها نضيفه, هي بتخاف علي نفسها بردو
لكن حلوه أوي حكاية الكوكاكولا دي, وانا اللي كنت فاكره ان كانت امنياتهم رجوع أرضنا كلها لينا, طلعت الكوكاكولا والشوكولا, عقول

ذو النون المصري يقول...

لا الكرامه طبعا
ايش الكوكاكولا علشان تحطها جنب الكرامه؟

ibn nasser - ابن ناصر يقول...

صاحب البوابه ...
هذا من كركمك والله ولكن نحاول ان فعل اي شيء ... ضد الطغيان
تحياتي

ibn nasser - ابن ناصر يقول...

أماني
ههههه اه يا ستي مصانع اتصنيع الثقيل ده مش مهم تجريف اراضي مش مهم ... كرامه مش مهم المهم
بيبسي ... كنتاكي ..بقول لواحد مره انا مقاطه بصلي كده بريبه وقالي انت اكيد مجنون !!!
تحياتي في زمن الجنون

ibn nasser - ابن ناصر يقول...

esraa2
ههههه بتسألي اومال بلدنا فين هو نجادي اما يروح في داهيه هيلاقينا هناك مستنيينوا في داهيه2
تحياتي

ibn nasser - ابن ناصر يقول...

ذو النون المصري
ليه هي لكوكاكولا طعمها وحش ..انا سألت ظابط شره قبل كده ايه احلي حاجتين في الدونيا .قاللي السجاير والبيبسي !!!
تحياتي

bastokka طهقانة يقول...

انا لا اشرب الكولا مقاطعاها
و الكرامة حالة غير اختيارية لاني مولودة بيها


اوروفوار

micheal يقول...

للاسف احنا بقينا مدمنيين كوكا
الكرامه ماتت من زمان
تحياتي لك

واحد من الناس::طارق:: يقول...

تختار الكرامة ولا الكوكاكولا ...؟
اسمحلى يا ابن ناصر .. سؤال واطروحة غير منطقية ولا واقعية بالمرررررررررة
ليه ؟
سؤالك فى 3 عناصر..
تختار
كرامة
كوكاكولا
1- تختار
هو احنا لو لىنا القدرة على الاختيار اصلا كان ممكن السؤال دة يتسأل؟.. احنا لو بنقدر نختار واللى عاوزينه هو اللى بيكون ماكنش دة بقى حالنا وكان هايبقى عندنا الاتنين الكرامة والكولا.. صح؟
2- الكرامة
هو احنا لو عارفين اصلا معنى الكرامة كنا ممكن نخليها محل اختيار مع اى حاجة تانية ..؟ لو عارفين اصلا معنى الكرامة كنا مش هانقبل ابدا حد يفرض علينا حاجة ولا يفرض علينا حد.. يعنى كان هايبقى عندنا القدرة على الاختيار .. وساعتها هانقدر برضو نشترى الكولا....صح؟
3- الكولا
هو انا لو معايا فلوس الكولا اصلا كنت هاجيب بيها حاجة تسد الجوع او علاج ولا فيزا لاى خرابة برة البلد اللى لا اقدار اختار فيها ولا لى كرامة فيها.

AbdElRaHmaN Ayyash يقول...

وقع بيان المدونين للتضامن مع عبدالمنعم محمود
شارك بتوقيعك
أنشر البيان في كل مدونة تعرفها
ساهم في حرية المدونين .. وحرية منعم
http://free4monem.blogspot.com/

ibn nasser - ابن ناصر يقول...

باسكوتا الطهقانه
طيب الكوكاكولا مقاطعاها ,,لكن حكاية الكرامه د للأسف مش مولوده بيها ..لأ ماتفهمينيش غلط انا قصدي سلبت منك فانتي لا تمليكيها شوفيلو في اي سفاره في العالم ,,قوليلهم انا امريكانيا وشوفي المعامله قولوه انا مصريه وبضحك عليكم ههههه ,,الالم بيوجع صح عادي مصريه بقي
تحياتي

ibn nasser - ابن ناصر يقول...

مايكل
والله انت جبت المفيد ... اصبحت الكوكاكولا تجري في عروقنا والكرامه ليس لها وجود بيننا
تحياتي

ibn nasser - ابن ناصر يقول...

طارق واحد من الناس
يخرب عقلك -سوري علي اللفظ - بس ايه ده ده علي كده ولا حصلت كرامه ولا كوكاكولا
يانهااري ده احنا ضايعيين ضايعيين
تحياتي

ibn nasser - ابن ناصر يقول...

عبد الرحمن عياش
ماسي يا بطل هنوقع لاننا ل نرضي الظلم
تحياتي

a7lam 3adya يقول...

كوكاكولا والا كرامة ؟؟

انا زى الناس التانيين لما احب اختار اكون اعرف الحاجتين عشان اقدر اختار بينهم ... يعنى الكولا وعرفناها طعمها ماسخ ومفيهاش ستيم .. بس الكرامة دى باه الاستيم بتاعها نظامه ايه ؟؟ ويا ترى في منها الصاروخ والا كلها كانز بس ؟؟

الموضوع محتاج شوية شرح ..

وكمان لما يى رجل طويل عريض يقلك اقصى امنياته ساعت الحرب انو يشرب كوكاكولا .. اعرف انه راجل عبيط يعنى .. ههههههههه كنت فاكراه هيقول ان مصر تكسب الحرب ؟؟

مكنش نفسه كمان فى سيجارة مارلبورو؟؟ اكيد كانت شاحة والبوست الجاى اعمله السيجارة ام الانتصار ؟؟

هم يضحك وهم يموت

ibn nasser - ابن ناصر يقول...

احلام عاديه
هههههههه علي رأيك هم ضحك وهم يموت , شوفتي الناس حاجه مش مقوله فعلا , ناس مش عايزه كرامه خااالص واهو انا لسه قار مقاله في الاسبوع بعنوان:تحيه الي الدبلوماسين في عهد ناصر... وهذا تعقيبا علي ما قاله وما فعله مدير الجامعه الامريكيه ,قال كلام ..بس احنا طبعا مانقدرش نفتح بقنا امام الاسياد الامريكان ..عادي
..وبالنسبه للكرامه لأ في منها دايت افتحلك ازازه!!!؟
تحياتي

yasmina يقول...

اخي ابن انصر
انا اول مرة ادخل عندك بس المدونة رائعة والموضوع ده حلو جدا

عاوزة اقولك ان احنا في فلسطين بنحب عبد الناصر جدا لانه كان يحب عرفات وكان يعمل من اجل القضية الفلسطينية
وبجد انا ساكون زائرة دائمة لك لو سمحت طبعا

وكمان شيء تعريفك لنفسك عجبني جدا
وارجو ان تزورني دائما وتعطيني رايك بما اكتب
تحياتي واحترامي

ibn nasser - ابن ناصر يقول...

يسمينة غزه
اول حاجه اشكرك علي اطرائك للمدونه وانا اتشرف بزيارتك للمدونه في اي وقت وانتي اللي تسمحيلي ابقي لاجيء عندك ...لاجيء بلاش كلمة لاجيء دي هههه وعلي فكره معرفتش رايك باينك بتحبي الكوكا كولا ههه
تحياتي

mohand يقول...

السلام عليكم
مش عارف اهرج ولا اتكلم جد
كان نفسي اقولك الاجابه المضحكه
بسم الله الرحمن الرحيم
الاجابه تونس


بس لو قولتلك الكرامه
هترجع تاني
قالها احمد ادم
عاملونا في بلدنا مواطنين درجه تانيه عاملنا العالم مواطنين درجة ثالثه

تحياتي
مهند المصري

صاحب البوابــة يقول...

اين جديدك عزيزي ابن ناصر

تحياتي

------------------
صاحب مدونة البوابة

ibn nasser - ابن ناصر يقول...

مهند المصري
احنا مش درجه تانيه لان تانيه يعني في بعدينا لا احنا اخر درجه ..
تحياتي

ibn nasser - ابن ناصر يقول...

الجديد نازل قريب انشاء الله
تحياتي

yasmina يقول...

ابن ناصر
ربنا يسامحك
انا مش بس بحبهاش بكرهها جداومقاطعاها مثلك
بس بايني غفلت عن التعليق عليها علشان كنت معجبة جدا بمدونتك حتى سوري كتبت اسمك غلط
بس الصراحة انا من المثلث وليس غزة
فانت اكيد لاحظت انني من عرب 48
تحياتي

ibn nasser - ابن ناصر يقول...

يسمينه
اوعي تكوني زعلتي ده انا بهزر معاكي , وارجوكي تقوليلي انك مش زعلانه
تحياتي

yasmina يقول...

طبعا مش زعلانه
احنا اخوة في العروبة والاسلام والنضال ضد المستبدين
سلام

ibn nasser - ابن ناصر يقول...

شكرا ,,بس تخدي علي الهزار بقي ,, هههه
تحياتي

bentfalestine يقول...

هو مش سؤال غريب لانك بتقارن بين كوكا كولا و بيبسي منتجين اهم من الخبز عند العرب طبعا و زي ما انت عارف الناس متعوده ع طعم النوعين بس الكرامه اشك انه الجميع بعرف طعمها و بدون تجني ع حد
عارف السوق الفلسطيني ثاني اكبر مستورد للبضائع الصهيونية و الاجنبيه و انا بصفتي مقاطعه روحت اشتري غرض فبسال صاحب المحل ما في عربي من هالنوع ضحك و قالي اول مره حد بيسال عن منتج فلسطيني او عربي ..بيقولي يا بنتي لو جبت الفلسطيني و العربي بخسر لانه الناس بتشريش الا هالمنتجات ... عارف لو انه بيبسي اشي متطلب للحياة بزعلش بس هاي مضارها اكثر مع ذلك متمسكين فيها ..قبل فتره كنت ببلد عربي محترم ف كل المنتجات صهيونية طب يا جماعه احنا و محكوم علينا لانه ما في مورد ثاني و انتو؟؟
ابن ناصر الله يخليك تسالش اسئله محرجه انا مني و علي بقولك لا هاد و لا هاد بس هالنوعية من الاسئله بتحرج الراي العام .. بعدين المقارنه بنظرهم باطله الكوكاكولا طبعا تكسب كرامة مين و الناس نايمين ههههه رغاية اتحملني معلش

ibn nasser - ابن ناصر يقول...

بنت فلسطين
ههههه مانا عارف اومال يا جماعه اسرائيل بتورد صناعتها لمين!!؟ ماهو للعرب ماهو اسرائيل يضربو كل المصنع فلسطين تبني ودولنا باضايعهم ..اااااااااه يا وطن مخليانا خونه
تحياتي ورغي ايه اموال لو مش هنضف مخي من كلامك الحلو هنضفو من ايه خطب اولمرت وابو الغيط!!؟
تحياتي