أخبـار ابـن نـاصر

لا للتعديلات الدستورية

الاثنين، ١١ يونيو ٢٠٠٧

منارة الليبراليه وشعاعها الأسود


بعد ان قامت الجامعه الامريكيه بمنع دخول الدكتوره ايمان الزيني من مكتبة الجامعه الامريكيه لأنها ترتدي النقاب ! ويجب لتدخل ان تخلع النقاب نهائيا ! فقامت برفع دعوي ضد الجامعه لان هذا حقها وقد فصلت المحكمه الاداريه العليا في الموضوع وقضت حق السيده في الدخول بالنقاب وقامت الجامعه الامريكيه بالطعن في الحكم والمحكمه رفضت الطعن نهائيا , وقال مسئول من الجامعه ان بروتوكول الجامعه يقول انها يجب العمل بقانون الدوله وهذا بعد ان بلغت المحكمه الجامعه ان هذا الحكم واجب النفاذ ....

وها هنا نري بعد ان سقط القناع وظهر الوجه الحقيقي من دعاة الحريه والديموقراطيه والليبرليه

ومن أين!؟ من قلعة الليبراليه من المناره وهاهي الليبراليه حرية العري فقط , حرية الراي الواحد وهذا بعد ان قال مسئول في الجامعه حجاب نعم ونقاب لا .-بيختار علي مزاجه بقي- فبإمكانك ان تدخلي وانتي في عري ها ستوماك وخلافه -ليبراليه بقي- لكن نقاب ده مش حريه ,,والحكايه كمان ان في طالبات كتير كان بيتم معهم هذه الحكايه ويرفض دخولهم لكنهم كانوا بيحولوا جامعه تانيه لكن الدكتوره ايمان رفضت ورفعت دعوي

وسؤالي هنا هل يمكن لهذه السيده المنقبه ان تكون ليبراليه ام الليبراليه تتعارض مع النقاب ! ام مع الدين! او الحريه اللي هما عايزنها

....
صورة هيفاء في الجامعه الامريكيه .. هي دي الحريه ولا بلاش

....

وبقول للجمامعة الامريكيه المحترمه اه انتوا مستقلين وبلدكم بتأكلنا وبتبعذق كرامتنا لكن ماتنسوش انتوا في بلدنا
. ..

وبعد الحكايه دي تلاقي ناس بتعمل احزاب ليبراليه ! ويقولك حريه (حرية الاختار علي مزاجه وادينا عندنا مثال بيقولك حجاب اه ونقاب لأ.. حريه تمام وفالسياسه هيقولك حزب ده اه وده لأ والاستاذه سكوت هنصور قالتلي علي مثال قالكي الحزب هناك حزب مدنيه أه احزاب دينيه لأ ده باين هيعملوا فينا زي اتاتورك ! ) عداله (يعني شفت اما يجي يحكم بين الناس علي مزاجه ) دوله مدنيه (مش فاهم يعني ايه ! اومال احنا في ايه ! قوول علمانيه هتستعبط ) ولا إيه!؟

وها هم الأن يعملون علي شيء يدعي
اليوم العــالمي لخلع الحجــاب !!
سبحان الله !

>>>>

وانا مش عارف هنلاقيها من مين ولا مين
من الليبراليون الغربيون اصحاب الافكار الوهميه والادعائات الكاذبه من الحريه وخلافه
ولا من الواطيين الديموقراطين بتوع الفكر الجديد

...

اعرف كل شيء عن الليبراليه
واخترت لكم هذه المقاله من اللينك الي فوق يا ريت تقرأوها علي مهل

..

تحياتي
ابن ناصر

هناك ٦١ تعليقًا:

Unknown يقول...

الليبرالية

او الثغرة

اللى بيضحك بيها علينا فى كل مناسبة

يدونا على قفانا ويقولوا حرية

david santos يقول...

Nasser, liked that me of these your Mail, my Mail is:

david_santos_sjm@hotmail.com

Congratulations, David Santos

ibn nasser - ابن ناصر يقول...

مش فاهم حاجه
هههههههه رائع يدونا علي قفانا ويقولوحريه هههه
ايوهحرية الضرب علي القفالن همامايضربوش
تحياتي

ibn nasser - ابن ناصر يقول...

david santos
ive added you in the messenger my friend thank you very much
my regards

غير معرف يقول...

حرية وليبرالية وكوكو واوا

مقالتك داست على الجرح يابن ناصر العظيم ولعلها تفهم الشباب الطائش اللى بيجرى وراء الشعرات التى بدون معنى مثل الليبرالية والملوخية الفستقى والديمقراطية بتاع سجن ابو غريب ومعتقل جوانتمالو
هما لهم شعارتهم واحنا لنا شعارتنا واللى فى القلب فى القلب
طول عمرنا بنعرف الاصول والعادات المصرية والست الفلاحة المصرية اللى بتلبس الجلابية والطرحة وبتربط المنديل على شعرها من قديم الزمان ومحدش يقول ارهابية او اصولية والمصطلحات المكلكعة من بتوع الشعارات واصحاب المصالح الاستعمارية
احنا احرار نلبس اللى يتناسب معانا
وملعون ابو الليبرالية والعلمانية والبدنجانية اللى تخللى بناتنا يلبسوا زى الصورة اللى انت ناشرها وهى صورة تخدش الحياء

مع احترامى لمواضيعك القيمة التى تنشرها

ابو سليمان

ibn nasser - ابن ناصر يقول...

ابو سليمان
والله انت لخصت كل حاجه ..احنا بتوع البساطه وانت قلت الست اللي لبسه طرحه دي مش ست بس دي مصر نفسها علي راي الفاجومي مصر ياما يا بهيه يامو طرحه وجلابيه ..هما بتوع المصطلحات وبتوع الحريه بتاع جوانتامو ,,والصوره تخدش الحياء فعلا لكن هذا ما يريدو ,,وهذا ما يجب ان نقوله
تحياتي

yasmina يقول...

الحرية لما تتفهم غلط يكون تنفيذها غلط ثاني
وطبعا لا تتوقع من الجامعة الامريكية ان تفهم حرية فكر المسلمين اذا كانت الدول الاسلامية لا تحترم الحجاب وتمنعه مثل تونس

اذا كنا نتعامل هكذا فيما بيننا فعلينا توقع كيف يتعامل معنا الاخرون

اللهم اصلح الامة
تحياتي لك

ياسر سليم يقول...

سلام عليكم

بوست اكتر من رائع

ibn nasser - ابن ناصر يقول...

يسمينا
معك كل الحق ...لكن المشكله في من يصدقهم
تحياتي

ibn nasser - ابن ناصر يقول...

ياسر سليم
ده من زوقك

تحياتي

أمــانــى يقول...

بص بقى خف علينا شوية شوية اختك مشغولة بسم الله مشاء خلصت بقى امتحانات وسياتك فاضى كل شوية موضوع وباكون عايزة اقراها مش بالحق
بص بقى بتوع دعاة التحرر دول انا اتخنقت منهم اصلا والله ولا واحد فيهم عنده حرية دول كلهم ليهم مصلحة وكل البنات تكون برضو عندها حرية الفايدة ليهم
واصلهم يعنى بيخسروا كتير لما تكون محجبة انا لحظت حاجة غريبة جدا فى حرب كبيره علينا وقال ايه يوم والتانى مؤتمر ونداء علشان ايه قال الناس خلاص بقت افكارها متخلفة الحجاب والالتزام الدينى تخلف
حســـــبنا الله ونعم و الوكيل
معلش بقى رغاية ههههههههههههه
:D

مشروع انسان يقول...

ما شاء الله فكرك مستنير وجميل جدا انا اتفق معك بشدة فكثير ممن يتحدث باسم الليبرالية تجده يتصادم مع الاسلام وكان الحرية وقفت عند الالتزام باوامر الله وكان الليبرالية معناها رايى انا فقط مقدم على الاخرين وحريتى مقدمة عليهم حتى اذا اذيتهم سبحان الله انهم ليسوا ليبراليون انهم اصحاب اهواء يريدون ان يعيشوا بدين مفصل وبحدود مناسبة لعقولهم ولا حول ولا قوة الا بالله

ibn nasser - ابن ناصر يقول...

أماني -بنت جنوبنا
ماشي يا ست يعني مش فاضيالنا خالص !! ماشي يا ستي براحتك ,وطبعا في حرب عليكوا مش لازم مثلا اللي تكون واقفه في المحل علي مزاج الزباين ولا ايه!!
تحياتي

ibn nasser - ابن ناصر يقول...

إمام الجيل
فعلا فهي تبرر الفواحش وكل الفواس بالحريه المزعومه !!
وشكرا لزيارتك
تحياتي

micheal يقول...

ولا عمري اقتنعت بحريتهم و ليبراليتهم المزعومه
تحياتي لك

ibn nasser - ابن ناصر يقول...

مايكل
والله وانا معاك
تحياتي

Dr. Eyad Harfoush يقول...

تحياتي لك يا أخي العزيز، كم أسعد حين أتعرف على أحد الأحرار في هذا الوطن، قرأت الكثير في مدونتك، و أتمنى يوما أن القاك في ارض الواقع
د/ اياد حرفوش

ibn nasser - ابن ناصر يقول...

د.اياد حرفوش
الفارس العربي الاخير
والعظيم انها لحظه لا تقدر انك تتمني لقائي ,,فانا اتمني مراسلتك فقط!! تحيه لك ولل الابطال والاحرار وانا من المعجبين بشعر حضرتك جدا جدا فبدرس البلاغه الامريكي ومرور باود اقول بحبك وكل اشعارك ...
تحياتي للفارس العربي الاخير

ياسر مدني ...دينامو الإخوان يقول...

ايه الكلام الجامد ده
هو فيه ايه هنا
وعلبي العموم لسه قدامنا طريق طويل عشان نغيره وحنغيره بم انتو ايدكوا معنا شويه

ibn nasser - ابن ناصر يقول...

يسر مدني .دينامو الاخوان
يااه بس كده والله يا استاذ ياسر ياريت كلنا مع بعض بس قول لقيادات الجماعه ! نقوول نازلين مظاهره للمدون الاخواني الفلاني يقوم الاخوان مايجووش هنقاطع الانتخبات يخشوا ايدينا مع بعض بقي
تحياتي

The Alien يقول...

ياعم حرية ايه وديمقراطية ايه ... إنت بتصدق
كل دا كلام وأفكار بس الواقع هو واقع المصلحة
أمريكا بتعمل دا هناك عندهم مش عندنا
يعني مش فارقة معاهم حاجة غير مصلحتهم ودا طبيعي
بس مش موضوع النقاب -اللي أنا ضده - هو اللي أسقط القناع
لإن إنت عارف وأنا عارف إن النقاب دا سياسي أكتر منه ديني
ماعلينا عشان دا مش موضوعنا
الفكرة إنه أمريكا حاولت تطبق الديمقراطية عندنا
ولما لقت حماس وصلت وممكن الإسلاميين يحكموا
عرفت إن دا مش ف مصلحتها وبالتالي
بالجزمة وسلملي ع الديمقراطية

بس أنا عايز أقول حاجة بخصوص تعريف الليبرالية
حرية الأعتقاد مش معناها الإلحاد
وحرية السلوك مش معناها الفجور والدعارة

مينفعش نستني الديقراطية لما هما ييجوا يطبقوهالنا
لو عايزين حرية
يبقي لازم إحنا اللي نجيبها

تحياتي

ibn nasser - ابن ناصر يقول...

alein
والله رائع فعلا هما اما يلاقوا الحريه او الديموقراطيه بعمني اصح ضد مصلحتهم ساعتها يقولك باي باي للديموقراطيه ..
وفعلا اللي عايزين الحريه هم اللي هعملوها زي ديموقراطية مريتانيا كده


تحياتي

BeLiEvEr يقول...

إنت خلصت إمتحانات و إنطلقت ولا إيه؟
:))

البوست هايل، بس زى عادتك، إتكلمت عن حاجات كتير ، و جمعت نقط كتير عن الموضوع، بس إنت عارفنى، لازم فيه حتت كده ما بتركبش معايا صح، فانا مختلف معاك فى حاجات كتير، أولها إنك ناصرى أصلا
:)))))))))

بالنسبة للبوست، لو حنمسك الموضوع نقطة نقطة
نبتدى بموضوع الدكتورة إيمان الزينى، يمكن تستغرب شوية، بس أنا شايف فى موضوع النقاب ده بالذات المفروض إن الجامعة على حق فيه، و انا شايف إن الموضوع ملهوش دعوة بالدين على قد إنه ليه علاقة بقواعد الجامعة نفسها، ضرورة التأكد من شخصية الناس اللى بتدخل أى جامعة، و ضرورة التأكد من شخصية الطالب أو الأستاذ، فمع النقاب، ده شئ مستحيل

يعنى لازم نسلم إن لازم يكون فيه قواعد للدخول للجامعة، و إذا كانت طبعا الصورة اللى إنت عارضها فيها حرية واسعةغير مقبولة من قطاع عريض من الناحية التانية، بس أكيد فيه قاعدة مثلا إن مفيش طالب ولا طالبة يروح بالمايوة الجامعة، يعنى مش حيدخلوهم من البوابة برضة، يبقى موضوع الحرية الكاملة اكيد مش معناها حرية اللبس فى الجامعة كل واحد حسب مزاجة. و خصوصا إذا كان اللبس ده بيتعارض أصلا مع فكرة التعلو أو التدريس، و خصوصا فى نظام التعليم الأمريكى، المعتمد على التواصل المباشر بين الطلبة و المدرس أو الأستاذ

النقطة التانية، بالنسبة لليبرالة، إحنا ليه دايما بنربط بين الليبرالية بالعرى و الإباحية و كل الحاجات دى؟
ديه ناس فاهمة الحرية غلط، زى ما اى واحد فاهم أى فكر غلط، زى ما فيه جماعات ذات أفكار قومية بتقتل فى القوميات الأخرى، زى الفكر النازى أو الصهيونية أو حتى الفكر القومى الصربى اللى كان شغال إبادة جماعية قى الألبان، ده معناه إن فكرة القومية نفسها فكرة غلط و شيطانية؟
طيب زى الفكر المتطرف الإسلامى اللى فهم إن الدين عبارة عن جهاد بقتل الناس فى كل مكان، فده معناه إن فكرة الدين نفسها دموية؟
فيه تطرف و شطط فى كل فكر، ببساطة لأنها كلها أفكار إنسانية، و حتفضل موجودة طالما وجد الإنسان على الارض، لان الإنسان كائن قد يخطئ و قد يصيب، يبقى أفكاره قد تخطئ و قد تصيب

مفيش فكر إنسانى جمع الحقيقة كاملة، انا كراجل مؤمن بربنا، الناس الوحيدة اللى عرفت الحقيقة كاملة هم الانبياء، وده راجع لانهم كانوا على صلة وثيقة مع صاحب الحقيقة و هوه الله. أى فكر بعد كده فيه من الخطأ على قد ما فيه من الصواب، و كل واحد حسب فكرة و تحليله للأمور، يؤمن بالفكرة اللى تعجبه.
يبقى النقطة اللى فى المقال عن الليبرالية فى اللينك اللى إنت حاطه،إن الناس اللى مقتنعة بالليبرالية دوله ناس محتلة عقولهم بوهم، يتحط فى نفس خانة رأيى هوه الصح و الباقى مش فاهمين حاجة، و جهلة.
و ده طبعا أسلوب مينفعش

طبعا مش حنتكلم عن أمريكا لانها فيها من المتناقضات ما يكفى، و بصراحة كمان، إحنا اصلا مش مؤهلين إن إحنا نحكم عليهم، لأن إذا كانوا هما سيئيين، إحنا نسبقهم فى النقطة دى بأجيال.
بس فيه نقطة عايز أوضحها، إن الحزب الجمهورى اللى هوه بيحكم أصلا مش بيعترف بحقوق الأقليات، و لاالمثليين جنسيا مثلا، و لا بحقوق كتيرة من اللى جات فى التعريف اللى إنت حاطه
فهل ده تناقض فى معنى الليبرالية عندهم، و لا هما فهمهم ليها إن لكل شئ فى الحياة حدود، و مفيش حاجة إسمها حدود مطلقة؟

النقطة التالتة، بالنسبة للأحزاب الدينية.
طيب دلوقتى، مش إحنا مقتنعين إن مواطنى الدولة متساويين فى الحقوق و الواجبات، و لا يفرق بينهم جنس ولا عرق و لا دين؟
طيب مش أى حزب مرجعيته جنسية، طبعا قصدى على نوعية الجنس علشان محدش يفهم غلط، أو ذو مرجعية عرقية أو دينية، يعتبر إخلال بمبدأ التساوى فى الحقوق و الواجبات؟

طيب بلاش النظرة القانونية دى، خلينا فى النظرة البلدى.
لبنان مثلا، الأحزاب اللى فيه أحزاب طائفية، يعنى يا ريت دينية كمان، ده كل طائفة فى أى دين لها حزب، تفتكر ده عمل ديموقراطية فى لبنان ولا عمل حالة، تفككت فيها الدولة إلى طوائف تتناحر.
بلاش لبنان، إيه رأيك فى العراق، اللى امريكا لما حبت تفتته، قامت طلعت فكرة الأحزاب و الطوائف، و اللى حصل بعده، إن البلد بقت متقسمة طوائف، و الكل يتناحر، ده يا راجل بقى فيه حزب بيدافع عن حقوق الأشوريين،يعنى ممكن فى مصر تلاقى حزب فارسي أو تركى للناس من الأصول الفارسية او التركية!

إزاى يبقىأى حزب أسمه حزب طائفى؟
الطائفية مكانها الجمعيات و المؤسسات المدنية، تبقى مقبولة، لكن احزاب؟
مش معايا إنت إن ده منافى لفكرة الدولة أصلا؟

طولت أنا فى التعليق ده، أول مرة أشوف تعليق أطول من البوست، بس زى عادتك، بتثير موضوعات بتفتح قصاد الواحد مجالات كتير للنقاش
:)

آسف للإطالة بجد، و سعيد بعودتك من الإمتحانات و إتحافنا ببوستاتك الدسمة دى

تحياتى لك

ibn nasser - ابن ناصر يقول...

بليفير عزيزي
يااه والله كلامك جامد لكن الست مش مارضتش تفصح عن شخصيتها دول قالو ممنوع من اساسه؟؟
تاني حاجه بتسأل ليه بتربط بن الليبراليه والعري ليه عشان الحريه انك تقلع مش تلبس واهي بانت في النقاب ...وانا خلصت امتحانات اه وعملت تلات موضوعات بد الامتحان! اتمني ان تلقي نظره عليهم
تحياتي ودائما المناقشه معك مفيده ولطيفه

غير معرف يقول...

مصطلحات

الليبرالية يعنى اية وتهمنى فى اية ؟
انا مصرى سواء مسلم او مسيحى ولنا تقاليدنا الشرقية وعادتنا فى اللبس والاكل والشرب والتفكير ودى حاجات خاصة بنا وبنعملها وبنعيشها اذا بنت فى الشارع لبست مش ولا بد ولاد الشارع او الحارة بيقفوا لها ويعاكسوها ويطلعوا عينيها وبنصلح نفسنا بنفسنا وزيتنا فى دقيقنا وسعداء بتقاليدنا وعادتنا
يطلع واحد يقول لك انا ليبرالى طيب الليبرالية دى فى اى ناحية واين تقع ومن عيلة مين هما كلمتين قراهم فى كتاب وعايز يبقى متثقف
ثم يا سيدى هى صرتنا انقطعت على صرة الجامعة الامريكية ولية محجبة تروح هناك متروح الازهر والا كلية البنات والحاجات بتاعتنا واللى هى منظرة وكتر فلوس وبعدين نشتكى لماذا نذهب الى اماكن الشبهات

اسف يابن ناصر وشكرا على مواصيعك الرائعة وربنا يوفقك وتبقى رئيس تحرير قد الد\نيا

السيد رضا

ibn nasser - ابن ناصر يقول...

السيد رضا
معك في كل ما قلت وفلا انا مش عارف ايه الي وداها هناك بس مش مبرر ليهم .. واكتب في جرنال بس بعدين ابقي رئيس تحرير !!
ههههه
:)
تحياتي

غير معرف يقول...

لية دايما بنربط الحرية بعرى الجسم؟؟؟
ولية اقتصر عندنا مفهوم الحرية على الخلع والتغطية والتعرية والاباحية؟؟؟

مفهوم الحرية أوسع وأكبر وأرقى من مجرد حصره فى المدلولات الجنسية والبدنية

الحرية حرية عقول يا عزيزى وحرية أفكار وحرية مشاعر

وليس معنى أن الجامعة الأمريكية لم تبح دخول المنقبة فانها تسمح بدخول العرايا

النقطة دى أعتقد يعنى انها نابعة عن خوف وهمى من الاسلاميين
يعنى الجامعة الأمريكية لم تخش من تفشي عدوى النقاب بين الطالبات
اطلاااقااا

ولكنها خشيت خشيتها المعهوودة والمتوارثة فى جيناتها من كل ما هو مغطى ويحمل صفة اسلامى
لدرجة أن شعور الخوف لديهم اصبح استباقى
زى الضربة الاستباقية كدة
الخوف من تستر انتحارى أو ارهابى بزى منقبةوالقيام بعمل ارهابة بداخلها كما حدث فى كثير من الحوادث

هى دى النظرية
لكن ليس تهجما على حرية السيدة فى ارتداء نقابها أو حتى مطالبتها بخلعه

تماما كما حدث فى جامعة القاهرة فى أعقاب العمليات الارهابية اللى جرت فى مصر
حصل نفس الفزع والهلع من كل من ترتدى نقاب وانت سيد العارفين طبعا انه علشان كدة تم تعيين ضابطات أمن سيدات على بوابات الجامعات المصرية والمدن الجامعية لأجل التأكد من وجة المنقبات فى حجرات منفصلة
وكذلك المطارات والأماكن الحيوية بمصر

الموضع كله لا يعدو أكثر من فوبيااا
الاسلاموفوبيا اللى ارتبطت بلون الدم


و اعذرنى
احنا اللى رسمنا لون الدم على كل ماله صلة بالاسلام
يبقا بلاش نلوم على الآخر لما يخاف مننا

ذو النون المصري يقول...

انا مش تقلان و لا حاجه لكن الاسبوع الاخير دونت فيه اكتر من مره و كنت مشغول بشده
و كمان كنت عامل حسابي انك مشغول في امتحانات
انا سعيد جدا بعودتك من الامتحانات و عودتك الي قواعدك التدوينيه سالما و بكامل تجهيزاتك الفنيه و التكتيكيه
الموضوع السابق علي هذا الموضوع انا قريته و هو ممتاز جدا
و انا كنت في غاية الانزعاج من الصور الدينيه اياها
و انا علي فكره ناوي اكتب في نفس موضوع الصور ده لاني عثرت بالصدفه علي صور مسيئه غيرها لا اعتقد ان الصور الدانماركيه اياها ممكن تيجي جنبها حاجه
............
مجهود متميز كالعاده
تحياتي

-_- يقول...

و لسة بنهلل لايمن نور و احنا منعرفش يعنى ايه ليبرالية

كلبوزة لكن سمباتيك يقول...

بصراحة مش بفكر اني ادوس على اللينك و لا اعرف اي حاجة عن الليبرالية

هو انا ناقصة مش كفاية علينا الديمقراطية اللي مش عرفينلها اخر اللي غرقانين فيها


تحياتي

kaed يقول...

أخى إبن ناصر
هم هكذا دائما و ظهر وجههم القبيح بعد واقعه الدكتورة إيمان
ألا يعنى إية لبرالية أنا اللى فهمتة إنها أحد مشتقات اللية بتاعة الخروف
هاهاهاهاهاهاهاهاهاهاهاهاهاهاها

ibn nasser - ابن ناصر يقول...

شهروزه
فعلا وجة نظر تستحق الاحترام بس هذا الخوف او الاسلاموفوبيا علي حد تعبيرك في منع دخول شخص لمجرد لبسه ضد حريتهم الذي يزعمونها انتي وضحتي الاسباب النفسيه والواقعيه لكن انا باخذ بالنتائج وليس الاسباب وهي ان تم منع سيده من دخول مكان لمجرد لبسها ! فقط
وشكرا
تحياتي

ibn nasser - ابن ناصر يقول...

ذو النون المصري
انا كنت بهذر فقط :)
وشكرا لك ومستنين موضوعاتك اللي دايما مثمرة ومعلوماتها ب قويه جدا جدا
تحياتي

ibn nasser - ابن ناصر يقول...

شارم
اه والله ماحد من اللي بيهلل يعرف يعني ايه لكن ايمن نور حاجه والليبراليه حاجه تانيه ...وانت ان شاءالله تبقي تكلمناعندك علي الموضوع ده بالصور القويه واسلوبك المشوق
تحياتي

ibn nasser - ابن ناصر يقول...

سمباتيك
فعلا لو كانت الديموقراطيه بتاعتهم دي كده اومال الليبراليه ايه!!؟


تحياتي

ibn nasser - ابن ناصر يقول...

قاااائدي
ههههههههه والله ماجتش علي بالي بس ممكن فعلا كان الراجل بياكل ليه كتير فسماه ليبرا..ليه
تحياتي

sohier يقول...

إبن ناصر

مرسى على التعليق

أنا أعرف بنات من الى كانوا رافعيين قضايا على الجامعه لنفس السبب

و لحد ما تم النطق بالحكم كانوا بيمشوا حاطين إيديهم على وشهم أو ورقه لكن ممنوع يحطوا النقاب

صاحب البوابــة يقول...

السلام عليكم

اشكر كل من تساءل عن غيابي

ووقف بجانبي في محنتي

تحياتي لكل شريف حر

ibn nasser - ابن ناصر يقول...

كبر دماغك
يا عم بعد كده يقولولنا نمشي لبسين ايه ونعمل ايه ..بعدين انا هايف قوي يعني هي جت علي ديه ! ده الامريان عاملوا فينا كك حاجه وربضه زي الكلاب معاهم

تحياتي

ibn nasser - ابن ناصر يقول...

صاحب البوابه
نحن بجانبك دائما
تحياتي لقلمك الذي مثل الرصاص

hana يقول...

أنا صحيح معرفش معنى الليبراليه
لكن اذا كان بين العرب بقوا بيبصوا للحجاب على انه نوع من التخلف
دة حتى قريت مرة انهم بيقولوا أنه لبس الحجاب بيعمل تحلف لمن يرتديه
يبقى عاوز دول الغرب تعمل ايه بقى
لا زم تبقى هيفا طبعا لا نها مثال من وجهة نظرهم للحرية

ibn nasser - ابن ناصر يقول...

hana
هقول بعد كلامك ايه فعلا بيقولوا تخلف لأ وبيجوا يتكلمو عندهم واحنا منقدرش نعمل حاجه ! أخرالزمن
تحياتي

.:.-=- ELGaZaLy-=-.:. يقول...

هممممممممممممممممم

للاسف انا فاهمها من زمان اوى

وبصراحة مش عايز اعرف حاجة زيادة

بس بوست هايل بجد

تحياتى

ibn nasser - ابن ناصر يقول...

الغزالي
يبقي ياريت تعرف ناس بقلك الرشيق وباسلوبك الجميل في الكتابه
تحياتي

غير معرف يقول...

ابناء مصر بنحب. هنقدر. هنغير
http://abna2masr.blogspot.com/

غير معرف يقول...

هى دى الحرية ولا بلاش بكره يطلعوا قانون عالمى بمنع الحجاب نهائيا

عمرو المصري يقول...

والله يابن ناصر انا طول عمري ماباحبش العالم دي

لكن هنعمل ايه للاسف عاملين زي ناس

احسن ناس يموعوا الكلام ويغيروا وياثروا ع الناس اللي مش فاهمين حاجة
مع ان اللي بيعملوه واضح عيانا بيانا لكل الناس

بوست شديد اوي

ربنا يكرمك

تحياتي من هناك
من
ارض الحرب

غير معرف يقول...

قرار رقم 10000000 من مجلس الامن


بناءا على طلب الجامعة الامريكية بالقاهرة ام النضال الساهرة وعلى طلب المندوب الامريكى والبريطانى تم استصدار القرار الذى ينص
1- منع الحجاب دوليا
2- اقامة صلاة الجمعة يوم الثلاثاء بعد العصر
القرار اتخذ تحت البند السابع الذى يخول القوة العسكرية لتنفيذة

يا حلاوة يا حلولى يا حلاوة

ابو فراس

alqassam يقول...

اذا نظرنا الى الحرية كقية فلابد ان تكون حرية الراى تحت سقف الثوابت حتى لايصبح المجتمع فوضوى لكن دعاه الليبراليه يريدون تحطيم كل قيم البشر ودينهم وانظرو اليهم بلا مبادى ولا دين ولااى قيم وان وجدت فهى من اجل اللذه ومواضيعك ومقالاتك جامده ابن ناصر اريد ان اراك فى القمة
اخوك القسام

شــــمـس الديـن يقول...

علشان دعاه الليبراليه يعرفوا حقيقة دعواهم و الاوجة الاخر الحقيقي للعملة

الليبراليه ضد كل شئ غيرها !
هي تقريبا فلسفتهم انهم يعملوا فوضي و ان الانسان تبقي مرجعيتة هي نفسة و اهواؤة و بس

و طبعا اي مظهر من مظاهر التدين هو ضد الليبراليه و يهددها من اساسها لانه يضع احكاما تنبع من عمق الضمير الانساني ول ذلك لابد من محاربة هذه الاشياء البغيضة ...

خير

علي الله الموضوع دا يكون اشارة للعاقلين ... لا احد الا هم

خالص تحياتي للمقال القيم و البسيط

ibn nasser - ابن ناصر يقول...

فاارس
جاي تعمل اعلان عندي هنا ولا ايه !! هات فلوس الاعلان

:)

تخياتي

ibn nasser - ابن ناصر يقول...

هند
والله تتعمل ابتدوا في فرنسا الي تونس ... ولسه ولسه

تحياتي

ibn nasser - ابن ناصر يقول...

عمرو المصري-المحارب
ماهو انا هقولك حاجه بدال مابلاقوا تأثير علي الناس ومفيش توعيه فخلاص واحد ينيمك شويه بالديومقراطيه والتاني ليبراليه ويقولك ممنوع ويفتحلك جوانتنامو ..
تحياتي
من ارض القهر

ibn nasser - ابن ناصر يقول...

أبوفراس
بشرنا ياجدعااان ..اهو طوول يا ابو فراس رؤسائنا مش رجاله وبيعملوا هما كمان كده يبقي خلااص !
تحياتي

ibn nasser - ابن ناصر يقول...

القسام

فعلا وعندما تحطم كل االاسقف يحصل المصائب باسم الحريه وهذا غير مطلوب ..شكرا ليك صديقي

تحياتي

ibn nasser - ابن ناصر يقول...

شمس الدين
فعلا انتي اوضتي وجها أخر للليبراليه ..فكل شخص يصبح هو مرجعيته هذه مصيبه ..
وحكاية ضد الدين معروفه وعلني روحي مثلا حزب الجبهه الشعبيه الليبرالي ده !

تحياتي

شعبيه يقول...

يا جماعه الناس دول في بلادهم مع انهم يعني مش بيموتوا فينا بس بيحاولوا انهم مايفرقوش لا في الشغل ولا في المعامله لكن هما واخدين فكره عن الارهابيين انهم يا إما لابسين جلابيه قصيره وبنطلون ومربيين دقنهم او لابسين نقاب ..يعني بيحاولوا يتقبلوا المحجبات بالعافيه.. يعني هي مجرد عقده لكن هناك البعض اللي لايتقبل اي شيئ.... وبعدين المشكله الحقيقيه ان ده يحصل عندنا لاننا المفروض فاهمين ثقافتنا وديننا لكن المحترمين في هذا الزمن مالهمشي مكان.....
تحياتي

ibn nasser - ابن ناصر يقول...

شعبيه

والله قلت فعلا الكلام المظبوط .والجانبي غلطانين بس معلش اللي عايز يقعد عندنا بشروطنا

تحياتي

غير معرف يقول...

السلام عليكم ورحمه الله وبركاته

البلوج جميل جدا ...بس ليا عتاب على وجود صوره المطربه...كان ممكن حضرتك تشير للحدث بدون صور....مش عارفه حضرتك معايا فى الرأى ولا ايه؟؟؟

ibn nasser - ابن ناصر يقول...

حاضر بس البوست ده قديم قوي .حاضر ماشي

انا بس بربط اليبراليه بالعري

تحياتي

s يقول...

thanks