أخبـار ابـن نـاصر

لا للتعديلات الدستورية

الجمعة، ١٦ نوفمبر ٢٠٠٧

وقائع وقفة قسم العمرانية

لا اعلم لماذا لم أري مصريون ضد التعذيب اصحاب الدعوة يبدو لأن شارع الهرم كان مليء بقوات الامن المركزي وبالرتب والبلطجية في كل مكان..
وأنا لا اعرف أي من الاعتذارات كل ما اعرفة هو اني ضربت وقد اخذت شنظة يد وكاميرة زميلتي ايناس واعتقال صديقي احمد الجيزاوي بجواري ..
المكان: أمام قسم العمرانية
الواقفون: الصحفية بثينة كامل ورجل يصحبها ,انا-ابن ناصر- ,احمد الجيزاوي,ايناس,شاهندة
الحدث: بثينة كـامل تحـاول توليع شمعة الامن يمنعها ونحن واقفون بجانبها الرجل الذي كان واقفا معاها سبه احدهم اشتبك مع الامن بدأ الامن(البلطجية والمخبرين-وليس العساكر) بدفع كل الواقفين لدرجة انهم دفعو بثينة كامل في وسط الشارع!! وقال لي الجيزاوي خلي بالك من البنات وهم كانو واقفين علي الرصيف وقت اندفاع الامن لبعد بثين كامل ,فرجعت للخلف ووقفت مع البنات وهم ورايا بالظبط لا اعلم متي تحركت ايناس يمينا لتصور بكاميرتها لتضرب الفلاش لتعلن الحرب!...لقد دق النــاقوس
وفجـأة وبسرعة رهيبة لا يتخيلها احد اندفع العديد من الامن العديد جدا وهجموا علينا ضرب وهما بيجرو ضرب في كل جتة بضرب ضربة ف كتفي واحدة علي رجلي من ورا برجع لورا هقع علي ضهري هجموا علي ايناس واحد ماسك ايديها اليمين عاوز الشنطة والتاني من ايديها الشمال عاوز الكاميرا مسكت في اللي ماسك فيها من اليمين وفجأة من زقة ابتعد جدا احمد الجيزاوي جاي بيجري صاروخ نط في الهوا"محدش له دعوة بيها" بيضرب بتوع الامن فيوشهم باللوح -يا خسارة الشعارات اللي علي اللوح- اسكت تسكت اسكت رجل يهتف ثلا ث مرات اسكت ثم الاخيرة (طب خدوة بقي) وفجأة الضرب وقف واتذقينا والجيزاوي معرفش راح فين دخلو في فتحه يمين فيها عربيات امن مركزي وكام بوكس ومكورباص...وعلي فكرة كل شوية كنا نلاقي حد يقول هو فيه هنا مظاهرة انا جاي من الفايس بوك انا عرفت من هنا ,الناس كانت هتبقي كتير
بس فيـن مصرين ضد التعذيب؟؟ فين الحركات الوطنية والقوي السياسية
والله انا اتعذبت من الساعه تلاتة لعشرة بالليل ماشي ومقعدتش ولا حطيت لقمة في بقي
وكمان مسكو الجيزاوي واخدو شنطةوكاميرة ايناس
هي كاميرة ايناس وشنطتها رجعت
والجيزاوي رجع الصبح النهاردة-الجمعة-
لكن انا مختش حقي من اللي عذبوني من الصبح لبلليل
اللي عذبوني مش الأمن بس لأ.. دول مصريـن مع التعذيـب
وواحد يقولي انتو عملتو عملية إنتحارية رايحين تقفو قدام القسم!
اومال المظاهرة كانت فين المفروض
.....
تحــياتي
ابن ناصر

هناك ٢١ تعليقًا:

مشروع انسان يقول...

لا حول ولا قوة الا بالله
الحمد لله ان احمد رجع بالسلامة
وربناينتقم من الظلمة
وفعلا المشكلة فينا
مش فيهم بس

wa7da masrya يقول...

أنا وصلني إيميل على مصريين ضد التعذيب بيقول إن الدكتورة ليلى سويف إعتقلوها أثناء الترتيب للوقفة و إن الوقفة تم إلغاؤها!!!؟؟ طبعا كان المفروض يكون فيه خطة تانية بديلة مش إلغاء الوقفة كده و في ناس ماكنتش تعرف

الموضوع معقد أنا لما وصلتني الدعوة فكرت إنها إنتحاريه و في نفس الوقت قلت إنها مبادرة ممكن لو نجحت تكسر حاجز تاني للخوف عند ناس كتير , و لما احد الأصدقاء سألني حتيجي؟ قلت له إني مشغولة بليل لكن اكيد الوقفة دي مهمة , معنديش كلام أقوله غير إنكم أبطال و فدائيين و أن الداخلية كالعادة لا يوجد بها إلا كلاب سعرانه

عصفور المدينة يقول...

حمدا لله على سلامة أحمد وجزاكم الله خيرا

ibn nasser - ابن ناصر يقول...

امام الجيل
الحمد لله
تحياتي

ibn nasser - ابن ناصر يقول...

واحدة مصرية
والله مانا عارف بقي
الحمدلله علي كل شيء
تحياتي

ibn nasser - ابن ناصر يقول...

عصفور المدينة
الله يسلمك
تحياتي

غير معرف يقول...

بالعقل كده

حتروح تعمل مظاهرة قدام القسم و مش متوقع انك نتضرب؟ ليه انت في سويسرا؟
مصريين ضد التعذيب رفضوا التعذيب اللي كانوا حايشوفوه و ماوروش وشهم
يالا حسابك عند الله و الحمدلله انها جت علي كده

ibn nasser - ابن ناصر يقول...

غير معرف
ماشي بس لو كنا اعداد كبيرة مكنوش عرفو يعملو حاجه
كانو هيعملو بس الشكل هيبقي مشرف وصوتنا وصل
تحياتي

إســمــاعـيـل بـــدر يقول...

أنا فخور بكم وإن شاء الله التغيير قادم لا محاله طالما فى مصر شباب رائع من أمثالكم يفتديها ويفتدى شعبه وأمته.

simple girl.. ..simple dream يقول...

يا جماعة انا اتبهدلت
الدنيا كلها فيها مظاهرات اشمعنا احنا اللى يتعمل فينا كل دة؟
بجد البوليس كان عنيف جدا
انا مش قادرة انسى منظر الجيزاوى وهما ملمومين حواليه وعمالين يضربوا فيه
بجد مصر قاسية اوى على ولادها

ibn nasser - ابن ناصر يقول...

اسماعيل بدر
شكرا هذا شرف منك
تحياتي

ibn nasser - ابن ناصر يقول...

سيمبل جيرل سيمبل دريم
هههههههههه
معلهش تعيشي وتاخدي غيرها
او تعيشي ومتخديش غيرها!
تحياتي

عصفور اسكندرية يقول...

السلام عليكم
الحمد لله علي رجوع احمد
دول مش امن مركزي دول بهايم مركزي
بس خطوه كويسه في حق المدونين

ibn nasser - ابن ناصر يقول...

عصفور الاسكندرية
خطوة كويسة دي خطوة مهببة
دول مابيكنوش اي احترام لأي حد!
تحياتي

MAKSOFA يقول...

والله أنا بأتجنب أقرا أو أشوف اللي بيحصل ده علشان ضغطي بيرتفع ، لكن برضه لامفر من دخول مدونتك وقراءه مايفور الدم
لك الله يامصرنا الحبيبه

yasmina يقول...

حمد الله على السلامة
والله معكم دايما

Unknown يقول...

وجعنى اوى الموقف يا ابن ناصر ... صحيح هى شعارات بتتقال و بس انت بتصدق يا ابنى الحاجات دى طول عمرنا كده جعجعة ع الفاضى و الحمد لله انك بحير و سلملى ع اصحابك و بالنسبة للبنات الحمد لله برده انها جت على قد كده انا باسمع عن بلاوى بتحصل مع البنات اخرهم صحفية شفتها بتكلم قريب على قناة دريم قطعلوها هدومها جوه فى القسم خرجت من القسم هدومها متقطعة ربنا يستر عليكوا و خلى بالكوا من نفسكوا

و تحية كبيرة ليكوا و قلب بيساندكوا ع الصعاب الى بتشوفها و احنا قاعدين كده فى بيوتنا

ibn nasser - ابن ناصر يقول...

مكسوفة
هههههههه
معلهش بقي دي الضريبة طيب يا مكسوفة كان الواحد بيخش عندك عشان يروق اعصابو دلوقتي بقي عندك نفس الحكاية!
تحياتي

ibn nasser - ابن ناصر يقول...

ياسمينا
شكرا لتضامنك
تحياتي

ibn nasser - ابن ناصر يقول...

عاليا حليم
شكرا لتضمنك جدا
بس احنا عاوزين الناس تنزل لو كان كلو نزل مكنوش يقدرو يعملو جنش حاجه
تحياتي

s يقول...

thanks